Հայաստանը հետաքրքրված է ԼՂ-ում ռուս խաղաղապահների ներկայության ժամկետի երկարաձգմամբ. ԱԽ գրասենյակ
Հայաստանը հետաքրքրված է Լեռնային Ղարաբաղում ռուս խաղաղապահների ներկայության ժամկետի երկարաձգմամբ՝ մինչև Լեռնային Ղարաբաղի կարգավիճակի հարցի վերջնական լուծումը: Այս մասին ՏԱՍՍ գործակալությանը հայտնել են Հայաստանի անվտանգության խորհրդի քարտուղարի գրասենյակից:
«Ցավոք, այս պահին իրավիճակը բավարար կայուն չէ անվտանգության տեսանկյունից: Վերջերս մենք տեսանք հրադադարի խախտում, ինչի հետևանքով հայ զոհվեց՝ քաղաքացիական անձ, կան նաև վիրավորներ: Հետևաբար, ԼՂ-ում ռուսական խաղաղապահ զորակազմի գործոնը կարևոր և նշանակալի կլինի այնքան ժամանակ, քանի դեռ չի լուծվել ԼՂ կարգավիճակի հարցը»,- նշել են ՀՀ ԱԽ-ում։
Անվտանգության խորհրդի գրասենյակում նաև ընդգծել են, որ Լեռնային Ղարաբաղում ՌԴ խաղաղապահ զորակազմը կարևոր նշանակություն ունի ԼՂ քաղաքացիների անվտանգությունն ապահովելու հարցում, ինչպես նաև ստեղծվող ենթակառուցվածքների, բնակչության և բեռների անխափան, կայուն տեղաշարժի անվտանգության երաշխավորն է:
