«ՔՊ» աջակցի կողմից Տեղում գումար բաժանելու դեպքը կստուգվի ոստիկանությունում
Սյունիքի մարզում «Քաղաքացիական պայմանագիր» կուսակցության աջակցի կողմից Տեղի ընտրատեղամասի մոտ գումար բաժանելու դեպքի վերաբերյալ ԶԼՄ հրապարակումն ուղարկվել է ՀՀ ոստիկանության Գորիսի բաժին՝ ստուգողական գործողություններ կատարելու նպատակով։ Այս մասին «Փաստինֆո»-ի հետ զրույցում հայտնեցին ՀՀ դատախազությունից։
Նշենք, որ երեկ սոցիալական ցանցերում տեսանյութ էր տարածվել, համաձայն որի՝ «ՔՊ»-ի աջակիցը Սյունիքի մարզի Տեղի ընտրատեղամասի մոտակայքում գումար էր բաժանում ընտրողներին։ ՔՊ-ական պատգամավոր Վահագն Ալեքսանյանը հայտարարությամբ էր հանդես եկել, որով ըստ էության հաստատել էր, որ տեսանյութում իրապես ՔՊ աջակից է, որի ձեռքին եղել է 50.000 դրամ, սակայն գումարի առկայությունն, Ալեքսանյանի պատճառաբանությամբ, եղել է շտաբի աշխատակիցների և վստահված անձանց համար ուտելիք գնելու համար։
Հիշեցնենք, որ երեկ Սյունիքի, Շիրակի և Տավուշի մարզի վեց համայնքներում ՏԻՄ ընտրություններ են անցկացվել։ Ընտրությունների արդյունքում Գորիս համայնքի ղեկավար է վերընտրվել Առուշ Առուշանյանը, Գյումրիում՝ «Բալասանյան» դաշինքի, Դիլիջանում՝ «ՔՊ» ներկայացուցիչը։
Իշխանությունների դիտակետում հատկապես եղել է Գորիս համայնքը, որտեղ իշխանությունները պարտվել են Առուշ Առուշանյանին, որն ի դեպ, տևական ժամանակ է, ինչ գտնվում է կալանավայրում։
