Իսրայելը հարվածել է իրանական ռազմական թիրախին․ կան զոհեր
Իսրայելի ռազմաօդային ուժերը հրթիռային հարվածներ են հասցրել Պալմիրայից հարավ-արևելք գտնվող իրանական T-4 ռազմական օդանավակայանին (Դամասկոսից 240 կիլոմետր հեռավորության վրա): Սիրիական պետական SANA գործակալությունը հայտնում է, որ հոկտեմբերի 13 -ի ուշ երեկոյան իսրայելական ինքնաթիռները հարձակվել են Հոմս նահանգի Պալմիրա քաղաքի մերձակայքում գտնվող թիրախի վրա ՝ Ալ Թանֆ շրջանից:
Ինչպես հաղորդել է Al Hadath հեռուստաալիքը, իրանական անօդաչու թռչող սարքերի հենակետը ենթարկվել է հարձակման: Աղբյուրի փոխանցմամբ՝ դրա վրա տեղակայված շիա ջոկատների զինվորները, որոնք կռվում են սիրիական զորքերի կողմից, կորուստներ են կրել: Չորսը զոհվել են, կան նաև վիրավորներ, սակայն նրանց թիվը չի նշվում:
Ավելի վաղ hոկտեմբերի 8-ի երեկոյան հաղորդվեց, որ Իսրայելի ռազմաօդային ուժերը Ա-Թանֆի ուղղությամբ հարձակվել են T-4 օդանավակայանի տարածքում իրանամետ զինյալների օբյեկտների վրա: Այնուհետեւ զգալի վնաս է հասցվել այն հենակետին, որի վրա իրանամետ աշխարհազորայինները վարժվել են անօդաչու թռչող սարքերի կիրառմանը: Ոչնչացվել են անօդաչու թռչող սարքերի արձակման հարթակները: Սիրիական բանակի հրամանատարությունը և ռուսական հրամանատարության ներկայացուցիչը պնդել են, որ սիրիական հակաօդային պաշտպանությունը որսացել է իսրայելական ինքնաթիռների արձակած 12 հրթիռներից 8 -ը: SOHR- ը հայտնում է, որ սպանվել են մի քանի իրանամետ աշխարհազորայիններ:
