Առաջին հերթին, դա ոչ ոք չի պահանջում․ Վրաստանը կհանձնի՞ Սաակաշվիլիին Ուկրաինային
Վրաստանի իշխանությունները բացառում են Վրաստանի նախկին նախագահ Միխեիլ Սաակաշվիլիին Ուկրաինային արտահանձնելու տարբերակը: ՏԱՍՍ գործակալության փոխանցմամբ՝ այս մասին երկուշաբթի հայտարարել է Վրաստանի վարչապետ Իրակլի Ղարիբաշվիլին:
«Բացառվում է: Ես 100 տոկոսով վստահ եմ, որ Սաակաշվիլիին ոչ ոք ոչ մի տեղ չի փոխանցի: Առաջին հերթին, դա ոչ ոք չի պահանջում: Առնվազն 6 տարուց նա կկարողանա գնալ ցանկացած երկիր»,- ասել է Ղարիբաշվլին՝ պատասխանելով Ուկրաինային արտահանձնելու հավանականության մասին հարցին:
Ինչպես ընդգծել է Վրաստանի կառավարության ղեկավարը, նախկին նախագահը ստիպված կլինի բանտում մնալ վեց տարի՝ ըստ դատավճռի:
Հիշեցնենք, որ Միխեիլ Սաակաշվիլիին ձերբակալել են հոկտեմբերի 1-ին, երբ վերջինս վերադարձել է Վրաստան՝ երկրում հոկտեմբերի 2-ին կայանալիք ՏԻՄ ընտրություններում ընդդիմադիր ուժերին աջակցելու համար: Նախկին նախագահին երկրում հեռակա կարգով դատապարտել էին պատգամավորին ծեծի ենթարկելու և բանկիրի սպանության կազմակերպման համար: Բացի այդ, նրան մեղադրանք է ներկայացվել ևս մի քանի գործով, այդ թվում՝ պետական միջոցները մսխելու, լիազորությունների չարաշահման և երկրի սահմաննն ապօրինաբար հատելու համար:
