Պարոն Օհանյան, Ձեր սանդղակով Ձեր որդուն գնահատեք․ Արփի Դավոյան
Մեր կառավարությունում այնքան ինքնաքննադատություն կա, որ երբեք ՀՀ ոչ մի կառավարությունում չի եղել։ ԱԺ-ում այս մասին ասաց «Քաղաքացիական պայմանագիր» խմբակցության պատգամավոր Արփի Դավոյանը։
Պագամավորը, դիմելով ընդդիմադիր գործընկերներին, մասնավորապես «Հայաստան» խմբակցության ղեկավար Սեյրան Օհանյանին, առաջարկեց գնահատական տալ 44-օրյա պատերազմի ժամանակ առաջնագծում ծառայած իր որդուն։
«Ձեր սանդղակով գնահատական տվեք ձեր որդուն այս ամբիոնից։ Ասում եք, որ չափից շատ երիտասարդացրել ենք ԶՈՒ-ի ղեկավարությանը։ Վիգեն Սարգսյանին մենք չենք նշանակել, դուք էիք նշանակել։ Ուտելիքների մասին եք խոսում, բայց մեր գործընկերները փաստեցին, թե բանակում ինչպիսի սնունդ է եղել»,-նշեց Արփի Դավոյանը։
Վերջինս նշեց, որ միասին կպայքարեն կոռուպցիայի դեմ և կտեսնեն, թե ովքեր ինչ ունեցվածքներ են ունեցել, ինչեր են ձեռք բերել տարիների ընթացքում և ինչերից են խոսում։
«Կտեսնենք՝ ով ինչ աշխատավարձեր է ստացել և ինչ ունեցվածք ունի այսօր, ինչ գույքի է տիրապետում և կխոսենք այդ մասին։ 2018թ.-ի մայիսից հետո ստեղծվել էր ոչ իրական մի իրավիճակ, որին բոլորդ հավատացիք։ Այստեղ նստած մարդիկ հավատացին մի իրականության, որն ընդհանրապես չէր համապատասխանում ՀՀ-ում տեղի ունեցող գործընթացներին։ Դուք հավատացիք լրատվամիջոցների ստեղծած իրականությանը և այդպես գնացիք ընտրությունների։ Ասում էիք, որ ձեզ որպես ընդդիմություն չեք զգում, որպես իշխանություն եք քարոզարշավ անում։ Դա էլ ձեր կերտած իրականության պատճառն էր»,-ասաց Արփի Դավոյանը։
