ԱԺ աշխատակազմը մտադիր է ավելի խստացնել անվտանգության միջոցառումները. NEWS.am
Ազգային ժողովում անվտանգության միջոցառումների խստացումը չի սահմանափակվի միայն լրագրողների տեղաշարժի վերաբերյալ նոր կարգավորումներով եւ ԱԺ նիստերի դահլիճի մուտքերի մոտ մետաղորսիչ սարքեր տեղադրելով։ ԱԺ աշխատակազմը քննարկում է խորհրդարանի միջանցքներում նոր դռներ տեղադրելու եւ պատգամավորներին էլեկտրոնային անցաթղթեր բաժանելու մասին։
Ազգային ժողովի աշխատակազմի ղեկավարի տեղակալ Աննա Գրիգորյանը հաստատելով, որ նման աշխատանքային քննարկումներ կան, NEWS.am-ի հետ զրույցում ասել է, թե նման միջոցառումներ նախաձեռնելու նպատակը ոչ թե սահմանափակումներն են, այլ ԶԼՄ-ների եւ ԱԺ աշխատակազմի կապը ավելի համակարգային ու գործընկերային դարձնելը։
«Դրա անհրաժեշտությունը բխում է միմիայն անվտանգության նկատառումներից։ Մենք հղում ենք անում ռեժիմին, որն ընդունվել է 2016թ.–ի դեկտեմբերի 16–ին, եւ ուժի մեջ մտել 2017–ին, սակայն չի ներառել «ԱԺ Կանոնակարգ» օրենքի կետերը։ Այդ կետերը հիմա զետեղվել են, եւ հենց դրանով են պայմանավորված փոփոխությունները, որոնք, կրկնում եմ, բխում են անվտանգության նկատառումներից, վստահեցնում եմ, որ այլ միտում չկա։ Լրագրողները իրավունք կունենան իրենց գործունեությունն իրականացնել նախատեսված հատուկ վայրերում։ Բացի դրանից, եթե, օրինակ, լրագրողը ցանկանա պատգամավորին նկարահանել իր աշխատասենյակում, նրան կուղեկցեն պատգամավորի սենյակ։ Եթե այդ դռների գաղափարն իրականանա, ապա առանց ուղեկցողի, օրինակ՝ դուք, չեք կարող անցնել դրանից առաջ»,– նշել է Աննա Գրիգորյանը։
