Անհայտ անձինք պայթեցրել են Փոստանջյանի ամուսնու մեքենան․ ում է կասկածում Փոստանջյանը
Անհայտ անձինք պայթեցրել են «Երկիր ծիրանի» կուսակցության առաջնորդ Զարուհի Փոստանջյանի ամուսնու մեքենան։ Փոստանջյանը Sputnik Արմենիայի հետ զրույցում հայտնեց, որ պայթյունի հետևանքով տուժածներ չկան։
«Պայթյունից հետո հրդեհ է բռնկվել։ Հարևանները միանգամից արձագանքել են, հրշեջներ են կանչել։ Բարեբախտաբար հրդեհը շուտ են հանգցրել, հակառակ դեպքում ամեն ինչ այլ ելք կարող էր ունենալ, մեքենայի վերևով գազատար խողովակն է անցնում»,- ասաց նա։
Մեքենան պայթեցրել են Փոստանջյանենց տան բակում, որի հետևանքով այրվել է նաև կողքի մեքենան։ Հարցին, թե ով կարող է լինել ենթադրյալ մեղավորը, Փոստանջյանն ասաց, որ ամուսինն անձնական թշնամիներ չունի, մնում է ենթադրել, որ մեքենան պայթեցրել են իր քաղաքական հայացքների համար։
Դանակահարված Արման Անտոնյանի վիճակը ծանր է. նրան այլ հիվանդանոց են տեղափոխել
«Ովքե՞ր կարող են քաղաքական հետապնդում կամ ճնշումներ իրականացնել։ Գործող իշխանությունները։ Չեմ կարող ասել, թե ինչ են նախապատրաստում, որին կարող ենք դեմ լինել, բայց որ հաստատ դիտավորություն է, միանշանակ է»,- հավելեց Փոստանջյանը։
Նշենք, որ Զարուհի Փոստանջյանի ամուսինը` 45-ամյա Սուրեն Դրամփյանը, մասնագիտությամբ ատամնաբույժ է:
