Այս փուլում Ադրբեջանը լայնամասշտաբ ռազմական գործողությունների չի գնալու. Աբրահամյան
Այս պահին այնքան էլ հակված չեմ այն մոտեցմանը, որ սա կարող է վերաճել լայնամասշտաբ ռազմական գործողությունների։ Մամուլի ասուլիսի ժամանակ ասաց «Հենակետ» վերլուծական կենտրոնի ղեկավար, «Պատիվ ունեմ» դաշինքի անդամ Տիգրան Աբրահամյանը։
«Կարծում եմ՝ այս փուլում, գոնե կարճաժամկետ կտրվածքով Ադրբեջանը լայնամասշտաբ ռազմական գործողությունների չի գնալու։ Սա ոչ միայն չի բացառում լոկալ բախումները, այլ բավականին մեծ ռիսկայնություն է պարունակում։ Պետք է հասկանանք, որ կա մասշտաբի խնդիր և այս իրավիճակում լայնամասշտաբի ռիսկը հատկապես կարճաժամկետ կտրվածքով գոնե ինձ համար դեռևս ուրվագծված չէ»,-նշեց փորձագետը։
Դիտարկմանը, որ ՀՀ վարչապետի պաշտոնակատար Նիկոլ Փաշինյանը օրերս հայտարարեց, որ Ադրբեջանը պատրաստվում է պատերազմ սանձազերծել Հայաստանի ու Արցախի դեմ, Տիգրան Աբրահամյանը նկատեց՝ այս իրավիճակում բավականին խորը հակասություն կա.
«Մի կողմից Նիկոլ Փաշինյանի հնչեցրած հայտարարության, որը որևէ այլ պայմաններում ենթադրում էր պետության կողմից իրականացվող մեծածավալ աշխատանքներ։ Եթե ասում ես, որ բախումների հավանականություն կա, ապա սա ենթադրում է երկիրը խաղաղից ռազմականի տեղափոխելու նախապատրաստական աշխատանքներ։ Տեսել ենք իրավիճակ, երբ Հայաստանից հնչել են կոշտ հայտարարություններ, Ադրբեջանից հնչել են հայտարարություններ պատերազմի նախապատրաստման կամ Հայաստանի, Արցախի տարածքների նկատմամբ, դրանք վերածվել են գործողությունների»,-ասաց Տիգրան Աբրահամյանը։
