«Այնտեղ կռիվ չկա, դուք չեք կռվում, ինչո՞ւ մենք պետք է միջամտենք՝ կռվենք»․ Տիգրան Աբրահամյանը՝ ՀԱՊԿ քարտուղարի հայտարարության մասին

Եթե ՀԱՊԿ քարտուղարի հայտարարությունը դիվանագիտական լեզվից «թարգմանենք», ապա ստացվում է հետևյալը՝ այնտեղ կռիվ չկա, դուք չեք կռվում, ինչո՞ւ մենք պետք է միջամտենք՝ ձեր փոխարեն կռվենք։ Այս մասին ֆեյսբուքյան իր էջում գրել է «Հենակետ» վերլուծական կենտրոն ՀԿ ղեկավար, Արցախի նախագահի անվտանգության հարցերով նախկին խորհրդական Տիգրան Աբրահամյանը։ 

«ՀԱՊԿ քարտուղարը, անդրադառնալով մայիսի 12-ին ադրբեջանական զորքերի՝ ՀՀ տարածք ներխուժմանը, հայտարարել է, թե «պետք է հասկանալ, որ ՀԱՊԿ ներուժն օգտագործվում է միայն [անդամ երկրներից մեկին ուղղված] ագրեսիայի, հարձակման դեպքում: Այստեղ գործ ունենք, ըստ էության, սահմանային միջադեպի հետ: Փա՛ռք Աստծո, զոհեր չկան, կրակոցներ չկան: Սա սահմանային միջադեպ է, այն պետք է լուծվի, և մենք կողմ ենք այն խաղաղ ճանապարհով լուծելուն»։ 

Եթե այս հայտարարությունը դիվանագիտական լեզվից «թարգմանենք», ապա ստացվում է հետևյալը՝ այնտեղ կռիվ չկա, դուք չեք կռվում, ինչո՞ւ մենք պետք է միջամտենք՝ ձեր փոխարեն կռվենք։ 

Հիշեցի, որ իշխանությունը մայիսի 12-ի ներխուժումից հետո պարծենում էր, թե կրակոց չի եղել, միջադեպեր, բախումներ չկան, կարծես թե հպարտանալու բան էր, որ առանց դիմադրության հանձնել էին մեր տարածքները։ 

Ստացանք»,-գրել է Տիգրան Աբրահամյանը։