Քանաքեռ-Զեյթունում խմելու ջուրն աղտոտված է․ փորձանմուշներ են վերցվել
Քիչ առաջ Auroranews-ը ահազանգ ստացավ քաղաքացիներից այն մասին, թե այսօր Քանաքեռ-Զեյթուն վարչական շրջանի մանկապարտեզներից մեկից զանգել են ծնողներին և հորդորել գալ և վերցնել երեխաներին։ Պատճառաբանվել է, թե ջուրը աղտոտված է և տարօրինակ գույն ունի։
Auroranews-ը կապ հաստատեց «Վեոլիա Ջուր ՓԲԸ»-ի հանրային կապերի բաժնի պետ Մուրադ Սարգսյանի հետ, ով ասաց, որ տեղյակ են նշված խնդրից։
«Տեղյակ ենք, ջրի որակի լաբարատորիայի աշխատակիցները վերցրել են փորձանմուշներ, որոնց ստուգումը ցույց է տվել, որ անգամ այս վիճակում ջուրը վտանգավորություն չի ներկայացնում առողջության համար։ Փառք Աստծո, առողջապահական հիմնարկներ դիմողներ չեն եղել։ Ինչ վերաբերում է պատճառին, այն մեզ համար էլ է հետաքրքրություն ներկայացնում, այդ իսկ պատճառով «Վեոլիա Ջուր ՓԲԸ»-ի աշխատակիցները տեխնիկական սարքերի կիրառմամբ զբաղված են ողջ տարածքի ստուգմամբ և ջրագծի հնարավոր վթարի հայտնաբերման և վերացման աշխատանքով»,-ասաց Սարգսյանը։
Խնդրին արձագանքել է նաև Քանաքեռ-Զեյթուն վարչական շրջանը՝ տարածելով հայտարարություն․
«Քանաքեռ-Զեյթունի հարգելի բնակիչներ, տեղեկացնում ենք, որ այսօր առավոտվանից վարչական շրջանի մի քանի բնակիչներից ստացել ենք ահազանգ այն մասին, որ ծորակի ջուրը պղտոր է կամ ժանգագույն:
Վարչական շրջանի ղեկավարի աշխատակազմի համապատասխան աշխատակիցները կապվել են <Վեոլիա ջուր> ընկերության հետ, փոխանցել ահազանգը:
Ապահովության համար վարչական շրջանի ղեկավարի հրահանգով կասեցվել են վարչական շրջանի մանկապարտեզների աշխատանքները:
Ջրամատակարար օպերատորի հետ տարվում է համապատասխան գործառույթ՝ պարզելու ջրի պղտորվածության պատճառը և վերացնելու հետևանքը:
Իրավիճակը վերահսկողության տակ է»,-նշված է հաղորդագրությունում:
