Թրամփը ցանկանում է առաջադրվել երրորդ նախագահական ժամկետի համար. սկսվել են քննարկումներ. Reuters

ԱՄՆ նախագահ Դոնալդ Թրամփը մերձավորների հետ զրույցներում չի բացառել երրորդ ժամկետով առաջադրվելու հեռանկարը։

Ինչպես տեղեկացնում է Ռոյթերսը՝ հղում անելով վարչակազմի նախկին պաշտոնյային, Միացյալ Նահանգների ղեկավարը մտավախություն ունի դառնալ «կաղ բադ»՝ լիազորությունների ավարտին ազդեցությունն ու որոշումների նկատմամբ վերահսկողությունը կորցրած հեռացող քաղաքական գործիչ։

Փետրվարին Էն-Բի-Սի Նյուզին տված հարցազրույցում Թրամփը հստակ պատասխան չի տվել՝ նշելով․ «Դա հետաքրքիր կլիներ։ Բայց եթե ես պատասխան տամ, կյանքը շատ ավելի պակաս հուզիչ կդառնա»։

Սպիտակ տան ղեկավարի երկրորդ ժամկետն ավարտվում է 2029 թվականի հունվարի 20-ին։ Երրորդ անգամ պաշտոնավարելուն խոչընդոտում է ԱՄՆ Սահմանադրության 22-րդ փոփոխությունը։ Այս սահմանափակումը հաղթահարելու համար Թրամփից կպահանջվի իրականացնել գրեթե անհնարինը՝ ստանալ Կոնգրեսի երկու պալատների ներկայացուցիչների երկու երրորդի աջակցությունը և ապահովել վավերացումն առնվազն 38 նահանգում։