Սյունիքում եթե զինվորական քվեարկություն չլիներ, պատկերն էապես ուրիշ կլիներ. Վահե Հակոբյան
Եղել են համատարած սպառնալիքներ պետապարատի աշխատակիցներին։ Մամուլի ասուլիսի ժամանակ ասաց «Հայաստան» դաշինքի անդամ Վահե Հակոբյանը՝ անդրադառնալով հարցին, թե ինչու ՔՊ-ն Սյունիքից, մասնավորապես սահմանամերձ դարձած գյուղերից ավելի շատ ձայներ է հավաքել։
«Ընդ որում հիմնավոր կասկածներ ունենք, որ նույն զինվորները քվեարկել են մի քանի ընտրատարածքներում։ Դրա համար ստացանք այն, ինչ ստացանք»,-նշեց Վահե Հակոբյանը։
ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանն էլ հավելեց, որ սոցցանցերում բազմաթիվ տեսանյութեր կային, որտեղ երևում էին՝ ինչպես են զինվորներին բերում և սպաներն ընտրական տեղամասից դուրս չեն գալիս, նայում են։
«Ունենք տվյալներ, որ ասում են՝ պետք է ցույց տան, և հանձնաժողովի անդամները չէին կարողանում նրանց հանել ընտրատեղամասից, իսկ Սյունիքում զինվորների քվեարկությունն էական փոխում է պատկերը։ Սյունիքում եթե զինվորական քվեարկություն չլիներ, պատկերն էապես ուրիշ կլիներ։ Հիմնական խնդիրներից այն էր, որ մենք գյուղերում չենք հասցրել աշխատել, իսկ գյուղերը մեզ մոտ ամբողջությամբ հանրայինի ազդեցության տակ են»,-ասաց Ռոբերտ Քոչարյանը։
