Նոր մանրամասներ՝ Պուտին-Բայդեն առաջիկա հանդիպումից

Ռուսաստանի և Միացյալ Նահանգների ղեկավարներ Վլադիմիր Պուտինի և Ջո Բայդենի հանդիպման թեմաների ցանկում լինելու են Ուկրաինային, Բելառուսին և Նավալնիին վերաբերող հարցեր: Այս մասին տեղեկանում ենք Ռիա Նովստիից, որն էլ հղում է անում Ռուսաստանի Դաշնության Նախագահի օգնականին: 

Նրա խոսքով, պետության ղեկավարները կքննարկեն նաև ռազմավարական կայունությանը, համաճարակին, կիբերհանցագործությունների դեմ պայքարին, տնտեսական գործակցությանը, կլիմայի փոփոխությանը վերաբերող հարցեր: Օրակարգում լինելու են նաև հակամարտությունների հարցը` Ուկրաինա, Սիրիա, Լիբիա, Աֆղանստան և իհարկե Լեռնային Ղարաբաղ: 

Պուտինը և Բայդենը քննարկելու են երրորդ երկրներում ռուսաստանցիների կալանավորումը, դիվանագիտական առաքելությունների աշխատանքը և Ռուսաստանի և ԱՄՆ-ի հարաբերությունների ընդհանուր հարցերը: Նշվում է, որ երկու նախագահների որոշման դեպքում երկրների դեսպանները կարող են վերադառնալ Մոսկվա և Վաշինգտոն: Ռուսաստանի նախագահի օգնականը հավելել է, որ երկու կողմերն էլ կարող են խոսել նախապես չհամաձայնեցված ցանկացած թեմայի շուրջ: Դրանց թվում կարող է լինել իրավիճակը Բելառուսում և Ալեքսեյ Նավալնիի թեման: 

Հիշեցնենք, որ Բայդենն ու Պուտինը կհանդիպեն հունիսի 16-ին ՝ ժնևում: Նշենք նաև, որ Բայդենը պաշտոնը ստանձնելուց ի վեր առաջին անգամ դեմ առ դեմ հանդիպում կունենա: Ի դեպ, Պուտինի ժնևի այցը առաջին արտասահմանյան այցն է 2020 թվականի հուվարից ի վեր: