Արտակարգ իրավիճակ՝ Նուբարաշենի աղբավայրում. հրշեջները, վտանգելով իրենց կյանքը, մի քանի ժամ է՝ պայքարում են կրակի ու ծխի դեմ

Արդեն 2 ժամից ավելի է, արտակարգ իրավիճակ է ստեղծվել Երևանի՝ ժողովրդին հայտնի Նուբարաշենի աղբավայրում։ Ուժեղ կրակն ու ծուխն անգամ տեսանելի են Եևևանի տարբեր թաղամասերից ու Մասիս քաղաքից։ Օպերատիվորեն ժամանել են Արտակարգ իրավիճակների նախարարության փրկարար ծառայության 4 մարտական հաշվարկ, հրշեջ-փրկարարներ, ինչպես նաև Ճգնաժամային կառավարման ազգային կենտրոնի օպերատիվ խումբն ու հրդեհաշիջման ծառայողները։ 

Հրշեջներին օգնում են աղբավայրի աշխատակիցներն ու Երևանի քաղաքապետարանի համապատասխան բաժնի ծառայողները։ Երևանի քաղաքապետ Հայկ Մարությանի հանձնարարականով հրդեհաշիջման անընդհատ հրշեջներին ջուր են մատակարարում քաղաքապետարանի ջրատարները։  Տեղում ուժեղացված ծառայություն են կատարում ոստիկանության Նուբարաշենի բաժանմունքի աշխատակիցները՝ բաժանմունքի պետի գլխավորությամբ, որպեսզի հետաքրքրասեր քաղաքացիներն իրենց ավտոմեքենաները չկայանեն, որ հշեջները կարողանան անվտանգ աշխատել։ 

Ֆոտոլրագրողը հայտնում է, որ կրակն ու ծուխն իր սև գործն են անում և դժվարացնում հրշեջների ու աղբավայրի աշխատակիցների գործը, իսկ հրշեջները շատ հատվածներում վտանգելով իրենց կյանքը՝ ռետինե խողովակներով ջուր են հասցնում ու մարում են կրակի օջախները։ Հավանաբար, այս աշխատանքները կտևի մի քանի օր քանի որ տարածքը բավականին մեծ է։