Շվեյցարիայում Պուտինի եւ Բայդենի հանդիպման հնարավոր վայրն է նշվում

Ռուսաստանի եւ ԱՄՆ նախագահներ Վլադիմիր Պուտինի ու Ջո Բայդենի հանդիպման վայրի հավանական տարբերակներից է Ժնեւում La Grange առանձնատունը կամ Hôtel Résidence Parc des Eaux Vives հյուրանոցը, գրում է Լենտա.ռու-ն՝ հղում անելով տեղական ԶԼՄ-ներին: 

Նշվում է, որ այդ մակարդակի հանդիպման համար գոյություն ունեն որոշիչ գործոններ: Դրանց ամենաշատը համապատասխանում է դեպի լիճը բացվող տեսարանով շվեյցարակաին առանձնատունը: Ավելի վաղ La Grange առանձնատանը նկատվել են «ռազմական կոշիկներով մարդիկ»: Նրանք զննել են շենքը: Հաղորդվում է նաեւ, որ այգում, որի տարածքում տեղակայված է առանձնատունը եւ հյուրանոցը, մի քանի օր է, ինչ գտնվում են անվտանգության մեծաթիվ աշխատակիցներ: Երկրի ղեկավարների հանդիպման եւս մեկ հնարավոր վայրն է Hôtel Résidence Parc des Eaux Vives հյուրանոցը, որը գտնվում է նույն այդ այգում: 

Ավելի վաղ Կրեմլի պաշտոնական ներկայացուցիչ Դմիտրի Պեսկովը հայտնել էր, որ Վլադիմիր Պուտինի եւ Ջո Բայդոենի բանակցությունների հստակ օրակարգ չկա: Բացի այդ, կողմերը համաձայնեցրել են դեմառդեմ ձեւաչափով զրույցը: 

Ռուսաստանի եւ ԱՄՆ նախագահների հանդիպումը կկայանա Ժնեւում հունիսի 16-ին: Ավելի վաղ Սպիտակ տնից հայտնել են, որ Պուտինի հետ զրույցի համար Բայդենի ընտրած թեմաներից մեկը կլինի կիբերանվտանգությունը: