ԵՄ-ն արգելել է Բելառուսի ավիաընկերությունների թռիչքները միության օդային տարածքում

Ուրբաթ Եվրամիության դեսպանները հաստատել են Եվրամիության օդային տարածքում բելառուսական ավիաընկերությունների թռիչքների կամ դաշինքի 27 անդամ պետությունների օդանավակայաններում վայրէջք կատարելու ծրագիրը: Այդ որոշումն ուժի մեջ է մտնում շաբաթ՝ հունիսի 5-ի կեսգիշերին:

ԵՄ-ն նաեւ խորհուրդ է տվել միության անդամ երկրների ավիաընկերություններին խուսափել Բելառուսի երկնքում թռիչքներից, հաղորդում է Reuters-ը: Սակայն այդ առաջարկներն իրավական առումով պարտադիր արգելք չեն: Eurocontrol օդային շարժի վերահսկման եվրոպական գործակալության տվյալներով՝ այդ որոշումն անդրադառնում է շուրջ 400 քաղաքացիական չվերթներին, որոնք սովորաբար թռնում են Բելառուսի երկնքով ամեն օր, եւ որոնցից շուրջ հարյուր չվերթ կատարում են ԵՄ-ի կամ Մեծ Բրիտանիայի ավիաընկերությունները:

Նշենք, որ հունիսի 3-ին Բելառուսի կառավարությունը որոշել էր հունիսի 13-ից կրճատել Մինսկում ԱՄՆ դեսպանատան հաստիքակազմը: Բելառուսի ԱԳ նախարարությունը հայտարարել էր, որ կրճատում է դեսպանատան ինչպես դիվանագիտական, այնպես էլ վարչատեխնիկական անձնակազմը: Բելառուսը նաեւ սահմանափակում է վիզային ընթացակարգերն ու չեղարկում թույլտվությունը, որը տրամադրել էր USAID գործակալությանը երկրում աշխատելու համար: Այդ քայլերը ձեռնարկվել էին, երբ Բայդեի վարչախումբը վերականգնել էր լայնամասշտաբ պատժամիջոցներն ընդդեմ Բելառուսի ինը պետական ձեռնարկությունների: