Հորդորում ենք Մարուքյանին ԶՈւ գլխավոր շտաբի պետի մասին խոսելիս լինել հստակ. Ասատրյան
ՀՀ զինված ուժերի տեղեկատվության բաժնի պետ Սամվել Ասատրյանը ԱԺ «Լուսավոր Հայաստան» խմբակցության ղեկավար Էդմոն Մարուքյանին հորդորել է ԶՈւ գլխավոր շտաբի պետ Արտակ Դավթյանի մասին խոսելիս հստակ լինել։
«Մարուքյանը լրագրողների հետ ճեպազրույցում իրեն թույլ է տվել մերկապարանոց մեղադրանքներ հնչեցնել ՀՀ ԶՈւ գլխավոր շտաբի պետ, գեներալ-լեյտենանտ Արտակ Դավթյանի հասցեին։ Պատգամավորի «եթե»-ներով խոսքն այնքան անհիմն է, որ նույնիսկ հարկ չկա դրան անդրադառնալու, սակայն հորդորում ենք նրան ԶՈւ գլխավոր շտաբի պետի մասին խոսելիս լինել հստակ ու հասցեական» - գրել է նա։
Նրա խոսքով՝ պատգամավորն ու նրա խմբակցության որոշ անդամներ պարզապես լավ չեն պատկերացնում զինվորական գործը։
Հիշեցնենք` երեկ ԱԺ-ում լրագրողների հետ ճեպազրույցում ԼՀԿ ղեկավար Էդմոն Մարուքյանն ասել է․
«Եթե այսօրվա ԳՇ պետը Ապրիլյան պատերազմի մեղավորներից է, իսկ նա, ըստ զեկույցի, մեղավորներից է, չպետք է լիներ ԳՇ պետ, սա ինձ համար կարևոր ազդակ է, որ մենք չունենք անկողմնակալ քննություն այս իմաստով, և ով պետք է այս ընթացքում չի մեղադրվի, ով պետք չէ, այլ ճամբարում է, կմեղադրվի»։
