Թուրքիայի արձագանքը՝ Լատվիայի կողմից Հայոց ցեղասպանության ճանաչման փաստին

Լատվիայի խորհրդարանի կողմից Հայոց ցեղասպանության ճանաչումը դժգոհություն է առաջացրել պաշտոնական Անկարայում:

Թուրքիայի արտաքին գործերի նախարարությունը հանդես է եկել հայտարարությամբ՝ նշելով, թե այդ քայլը «քաղաքական շարժառիթներից ելնելով պատմությունը վերաշարադրելու անհիմն փորձ է»: 
«Մենք մերժում և խստորեն դատապարտում ենք այդ որոշումը»,- հայտնել են Թուրքիայի արտաքին քաղաքական գերատեսչությունից: 
Լատվիան մայիսի 6-ին պաշտոնապես ճանաչել և դատապարտել է Հայոց ցեղասպանությունը: Օրենսդիր մարմնի՝ Սաեյմայի կողմից ընդունված բանաձևում նշվում է, որ Լատվիան դատապարտում է մարդկության դեմ գործած բոլոր հանցագործությունները և գիտակցում է այդ հանցագործությունները ճանաչելու և հիշելու իր պարտականությունը՝ դրանց կրկնությունը կանխարգելելու նպատակով: Միաժամանակ ընդգծվել է, որ Լատվիան դատապարտում է այն հանցանքները, սպանդը և բռնի տեղահանությունը, որոնք իրագործվել են Օսմանյան իշխանությունների կողմից հայ ժողովրդի նկատմամբ և հարգում է Հայոց ցեղասպանության բոլոր զոհերի հիշատակը և հարգանքի տուրք է մատուցում բոլոր փրկվածներին: 

«Լատվիան հաստատում է, որ պատմական հարցերի շուրջ բաց և ազատ քննարկումներն անքակտելիորեն կապված են առողջ և հասուն ժողովրդավարության զարգացման հետ և կոչ է անում միջազգային հանրությանը գնահատական տալ այս պատմական իրադարձություններին, նայել դեպի այն ապագային, որը ցանկանում ենք կառուցել՝ առանց բռնության և անհանդուրժողականության, ապագա, որտեղ մարդու իրավունքները հարգվում են և յուրաքանչյուր անհատ կարող է լինել ազատ, անվտանգ և ապահով»,- ասվում է Հայոց ցեղասպանությունը ճանաչող բանաձևում։