Պատրաստվելով պատերազմի` մենք հակառակորդին դրդել ենք պատերազմի. Փաշինյան

Պատրաստվելով պատերազմի` մենք հակառակորդին դրդել ենք պատրազմի։ Այսօր ԱԺ նիստում կառավարության անդամների հետ հարցուպատասխանի ժամանակ նման հայտարարություն արեց ՀՀ վարչապետի պաշտոնակատար Նիկոլ Փաշինյանը` խոսելով 2018թ–ից հետո բանակում կատարված բարեփոխումների մասին 
«Հակառակորդը տեսել է, որ մենք 80-ականների զենքերի էջը փակում ենք, ես եմ հայտարարել` 2020թ–ի ամանորյա ուղերձում, Հանրապետության հրապարակում։ Եթե տեսնեին, որ մեր բանակը շարունակում է փլուզվել, քանդվել, էլ չեմ ասում հազար ու մի մանր-մունր հարցեր, որ մեր գնդի հրամանատարները փող չեն ունեցել, օրինակ, լամպ փոխելու։ Լամպը փչացել է՝ գնդի հրամանատարները պետք է մի ծանոթից խնդրեին։ Բյուջե ենք բացել` գնդի հրամանատարների կենցաղային ծախսերի համար։ Մենք պատերազմի վետերանների բնակարանային հարցն ենք լուծել, պետական բյուջեից 5 մլրդ դրամ տվել ենք, որ զինվորը տեսնի, որ վետերանի նկատմամբ կա վերաբերմունք։ Այո՛, պատրաստվել ենք պատերազմի, և դրանով հակառակորդին դրդել ենք պատերազմի»,– ասաց Փաշինյանը։

Նրա խոսքով, պատերազմից խուսափելու ամենակարևոր պայմանը հակառակորդի հետ ռազմական բալանսը համապատասխան պահելն է, ուստի, իրենք 2 տարվա ընթացքում փորձել են վերականգնել 20 տարվա ընթացքում կորցրած այդ բալանսը։

«Մեր նախորդներն ասել են` 7 շրջաններն ու Ղարաբաղի կեսը տալիս ենք, ու իրենց ասվել է` չէ, հույս չունենաք։ Ինչո՞ւ են ասել։ Որովհետև տեսել են` ինչով են զբաղված` Բադեն Բադենում, Հռոմում, հունական կղզիներում։ Ոմանք բանակ էին կառուցում, իսկ ոմանք` հունական կղզիներում` առանձնատուն, Հռոմում` հյուրանոց, Բադեն Բադենում` քոթեջ»,– ասաց Փաշինյանը։