Փաշինյանը չասաց, թե որ պատվաստանյութով է պատվաստվել

Այսօր Ազգային ժողովի հատուկ նիստում քննարկվում է ՀՀ վարչապետի ընտրության հարցը:

Ինչպես արդեն հայտնել ենք, այսօր առավոտյան վարչապետի պաշտոնակատար Նիկոլ Փաշինյանը իր կնոջ՝ Աննա Հակոբյանի հետ պատվաստվել է կորոնավիրուսի դեմ։

Անկախ պատգամավոր Թագուհի Թովմասյանը հետաքրքրվեց Փաշինյանից, թե որ պատվաստանյութով է պատվաստվել։

Ի պատասխան վարչապետի պաշտոնակատարը հայտարարեց, որ չի ասի պատվաստանյութի անունը։

«Կարող եմ ասել, որ մեր փոխվարչապետերից մեկը պատվաստվել է AstraZeneca-ով, մյուս փոխվարչապետը կպատվաստվի Sputnik V-ով և հույս ունեմ, որ ԱԺ նախագահությունից որևէ մեկը կպատվաստվի չինական պատվաստանյութով, որը մենք ունենք»,- վարչապետի պաշտոնակատարի այս հայտարարությունից հետո պատգամավորների մոտ զվարճանքի ալիք բարձրացավ։

Փաշինյանը իր խոսքում նաև հավաստիացրեց, որ եթե մեր Առողջապահության նախարարությունը, մեր համաճարակների կանխարգելման մարմինները որևէ պատվաստանյութ թույլ են տվել, որ մտնի շրջանառության մեջ, ապա այդ պատվաստանյութերը լավ պատվաստանյութեր են։

Հիշեցնենք, որ արդեն պատվաստվել են Առողջապահության նախարար Անահիտ Ավանեսյանը, Տիգրան Ավինյանը, ովքեր հայտարարեցին, որ պատվաստվել են AstraZeneca-ով։ Ապրիլի 29-ի կառավարության նիստի ժամանակ էլ վարչապետ Նիկոլ Փաշինյանը դահլիճում գտնվողներին հորդորեց գնալ և պատվաստվել։

ArmDaily.am-ի տեղեկություններով՝ վարչապետն ու նրա տիկինը պատվաստվել են Sputnik-V պատվաստանյութով։