Անահիտ Ավանեսյանը թուլություն ու մկանային ցավ է ունեցել AstraZeneca-ով պատվաստվելուց հետո

Առողջապահության նախարարի պաշտոնակատար Անահիտ Ավանեսյանը երեկ երեկոյան թուլություն ու մկանային ցավ է ունեցել AstraZeneca-ով պատվաստվելուց հետո: Այս մասին նա հայտնեց այսօր կառավարության նիստից հետո լրագրողների հետ զրույցում:

Նախարարը հավելեց, որ հիմա իրեն լավ է զգում, թուլություն ու մկանային ցավն անցել են:

Ավելի վաղ «COVID-19 Հայաստան» փաստահավաք խմբի անդամ Անի Հովհաննիսյանը ֆեյսբուքյան իր էջում գրել էր.

«Նիկոլ Փաշինյան, քո ղեկավարած կառավարությունն ամբողջությամբ ձախողել է կորոնավիրուսի դեմ պայքարը, հայտնել է կորոնավիրուսի մասին սուտ, կեղծ տեղեկություններ, ապակողմնորոշել է հասարակությանը, նպաստել կորոնավիրուսի տարածմանը ու հիմա փորձում եք մարդկանց համոզել, որ պատվաստվեն՝ նպատակ ունենալով իրացնել պատվաստանյութերի այն խմբաքանակը, որն արդեն գնել եք:

Ճառում եք, թե իբր AstraZeneca-ն լրիվ անվտանգ է այն դեպքում, երբ կան մահեր այդ պատվաստանյութից, աշխարհի մի շարք երկրներ արգելել են դրա կիրառումը:

Այլ երկրներում նման անպատասխանատու ու վնասակար գործողությունների համար քրեական գործեր կհարուցեին ու կդատեին իշխանության դիլետանտ անդամներին...»: