Ընտրախախտումները պետք է բացառվեն, իսկ ընտրախախտում անողները պատասխանատվության ենթարկվեն. Հովակիմյան

Ի՞նչ նպատակ է հետապնդում քարոզարշավի խոչընդոտման, տեղամասերի առաջ բռնության փորձերի և նման դեպքերով պայմանավորված դրույթներում նախատեսված պատիժների խստացումը: ՀՀ Քրեական օրենսգրքում փոփոխություններ կատարելու նախագծի քննարկման ժամանակ նախագծի հեղինակ Վահագն Հովակիմյանին հարց ուղղեց պատգամավոր Թագուհի Թովմասյանը և հետաքրքրվեց՝ թե ո՞ր դեպքից քանի անգամ է արձանագրվել և մարդիկ մնացել են անպատիժ:

Վահագն Հովակիմյանն էլ նշեց, որ դրա վերաբերյալ բոլոր թվային տվյալները կան Գլխավոր դատախազության հաշվետվության մեջ.
«Չեմ կարծում, որ օրենդրություն պետք է բարելավենք՝ զուտ թվերով պայմանավորված: Մեր խնդիրն է բարելավել օրենսդրությունը, որպեսզի բացասական երևույթներ ընտրությունների ժամանակ չլինեն»,-ասաց Հովակիմյանը:

Թագուհի Թովմասյանն էլ, արձագանքելով պատգամավորին, ասաց.«Ես Դատախազության հաղորդագրությունների տեղը գիտեմ, պետք չէ հիշեցում անել: Պարզապես ուզում եմ հասկանալ՝ որքանո՞վ են այս փոփոխությունները ռիսկային և նպատակահարմար: Իսկ դատախազության կայքի տեղը շատ լավ գիտեմ»:

Վահագն Հովակիմյանն էլ, պատասխանելով Թովմասյանին, ասաց՝ ընտրախախտումները պետք է բացառվեն, իսկ ընտրախախտում անողները պատասխանատվության ենթարկվեն: