ԱԺ–ն որոշեց` քարոզարշավը խոչընդոտողները կենթարկվեն քրեական պատասխանատվության
ԱԺ արտահերթ նիստում պատգամավորները երկրորդ և վերջնական ընթերցմամբ ընդունեցին Քրեական օրենսգրքում և հարակից օրենքներում փոփոխություններ կատարելու մասին օրինագծերի փաթեթը (կողմ 77, միաձայն), որը հեղինակել էր ԱԺ պատգամավոր Վահագն Հովակիմյանը։
Հիմնական զեկուցող Հովակիմյանը տեղեկացրեց, որ ընդունվել են կառավարության ներկայացրած առաջարկները: Դրանք հիմնականում վերաբերում են Քրեական և Վարչական իրավախախտումների վերաբերյալ օրենսգրքերում օգտագործվող եզրույթները Ընտրական օրենսգրքին համապատասխանեցնելուն:
ՀՀ քրեական օրենսգրքին վերաբերող նախագծից հանվել է 154.10 նոր հոդվածը, որով առաջարկվում էր ընտրություններին մասնակցող կուսակցության (կուսակցությունների դաշինքի) կամ թեկնածուի վերաբերյալ կեղծ տեղեկություններ հրապարակելու համար սահմանել քրեական պատասխանատվություն:
Ըստ նոր փոփոխությունների` քրեական պատասխանատվություն է նախատեսվում նախընտրական քարոզարշավը կամ քարոզչությունը խոչընդոտելու համար: Նշված արարքների համար նախատեսվում է երեք տարվա ազատազրկում։ Իսկ ընտրական տեղամասերում կամ դրանց մոտակայքում մի խումբ անձանց կողմից նախնական համաձայնությամբ բռնության սպառնալիքի համար նախատեսված է մինչև 6 ամսվա ազատազրկում:
Գլխադասային՝ Պետական-իրավական հարցերի մշտական հանձնաժողովի դրական եզրակացությունը ներկայացրեց հանձնաժողովի անդամ Արուսյակ Ջուլհակյանը:
ՀՀ արդարադատության նախարարի տեղակալ Արմեն Հովհաննիսյանն էլ նշեց, որ ընդունվել են գործադիրի ներկայացրած առաջարկները, և կառավարությունը նախաձեռնության վերաբերյալ չունի որևէ առարկություն:
Երկրորդ ընթերցմամբ քննարկվեց նաև ԱԺ «Իմ քայլը» խմբակցության պատգամավորներ Սիսակ Գաբրիելյանի, Ալեն Սիմոնյանի, Բաբկեն Թունյանի, Կարեն Համբարձումյանի հեղինակած «ՀՀ հարկային օրենսգրքում» փոփոխություն կատարելու մասին» օրենքի նախագիծը:
Սիսակ Գաբրիելյանը նշեց, որ առաջինից երկրորդ ընթերցում ընկած ժամանակահատվածում առաջարկներ չեն եղել:
Գլխադասային՝ Տնտեսական հարցերի մշտական հանձնաժողովի դրական եզրակացությունը ներկայացրեց հանձնաժողովի անդամ Հայկ Գևորգյանը:
Խորհրդարանը նախաձեռնություններն ընդունեց երկրորդ ընթերցմամբ և ամբողջությամբ:
