Սյունիքն ավելի վտանգվեց զուտ այն պատճառով, որ ժամանակին էշի ականջում քնած էինք. ազատամարտիկ Վովա Վարդանով
Իրերը պետք է կոչել իրենց անուններով. օրինակ, թուրքերը չեն սպանել հայ երիտասարդներին, հայ երիտասարդները զոհվել են Հայաստանը պաշտպանելիս. Սպանվում է զոհը, իսկ իրենք զոհ չեն, զոհված են: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց Հետախուզադիվերսիոն առաջին ջոկատի հիմնադիր, ազատամարտիկ Վովա Վարդանովը։
«Երկրորդ, պետք է դադարենք թուրքական անուններ օգտագործելը՝ Ջաբրայիլ, Լաչին, Զանգելան: Պետք է ասենք Կովսական, Բակուրավան, Գանձակ,ինչպես իրենք մինչեւ հիմա Ստեփանակետրին Խանքենդի են ասում: Քուռի աջ ափը Հայաստան է մինչեւ Փոքր Ասիա: Երրորդ, եթե մենք այս երկրի ճիշտ քաղաքացի լինենք, մեզ հնարավոր չի լինելու կոտորել, շեղել եւ հաղթել: Ընդամենը ցանկացած մարդ, ով իրեն մարդ է զգում, պետք է անի ակտիվ գործողություններ: Օրինակ, մեր կազմակերպությունն այս պահին հրետանու զորավարժություններ է անցկացնում զորամասերից մեկում»,-ասաց նա:
Հարցին, թե իր կարծիքով որքանով է վտանգված Սյունիքը, Վովա Վարդանովը պատասխանեց. «Բնական է, որ Սյունիքը վտանգված է, բայց նաեւ այսօրվա զենքի եւ տեխնիկայի հնարավորությունները հաշվի առնելով վտանգված է նաեւ Երեւանը, Տաշիրը, որովհետեւ հրթռը շատ հեռու է թռչում, տանկն էլ շատ արագ է տեղաշարժվում: Սյունիքն ավելի վտանգվեց զուտ այն պատճառով, որ ժամանակին էշի ականջում քնած էինք: Ոչ մի բան գրեթե չէինք անում, որ զարգանանք: Պահպանում էինք ստատուս քվոն ոչ միայն սահմանին, այլեւ մեր գլխի մեջ, մեր բանակում: Դա բերեց այս վիճակին: Հիմա պետք է լարված աշխատենք, որ կարողանանք մինուսները փակել»:
