Նավալնին հայտարարել է հացադուլը դադարեցնելու մասին

Ռուս ընդդիմադիր գործիչ Ալեքսեյ Նավալնին հայտարարել է հացադուլը դադարեցնելու մասին: Այս մասին գրում է «Ինտերֆաքս» գործակալությունը: 
«Ես հետ չեմ վերցնում ինձ անհրաժեշտ բժիշկ տրամադրելու պահանջը. ես կորցնում եմ ձեռքերիս և ոտքերիս մասերի զգայունությունը, և ուզում եմ հասկանալ, թե դա ինչ է և ինչպես բուժվել, բայց հաշվի առնելով առաջընթացը և բոլոր հանգամանքները, ես սկսում եմ դուրս գալ հացադուլից: Ըստ կանոնների, դա նույնպես կտևի 24 օր, և ասում են, որ դա նույնիսկ ավելի դժվար է: Այնպես որ, հաջողություն մաղթեք»,-գրել է Նավալնին «Ինստագրամ»-ում: 
Նավալնին հայտարարել է, որ արդեն 2 անգամ հետազոտվել է քաղաքացիական բժիշկների խորհրդի կողմից: 
«Վերջին անգամ հանրահավաքից անմիջապես առաջ էր: Նրանք ուսումնասիրություն և վերլուծություն են անում և տալիս են ինձ արդյունքները և եզրակացությունները»,-ասել է ընդդիմադիրը: 

Նա հիշեցրել է, որ իր բժիշկները նախօրեին հայտարարություն էին արել` կոչ անելով դադարեցնել հացադուլը: 

«Անկեղծ ասած, նրանց խոսքերը ... ինձ թվում է արժանի են ուշադրության»,-ավելացրել է նա: 

Մարտի 31-ին Նավալնիի կողմնակիցները սոցիալական ցանցերում հաղորդել էին, որ նա հացադուլ է հայտարարել՝ պահանջելով թույլ տալ, որ բժիշկն այցելի իրեն, և նրան դեղեր տրամադրեն: Նրա փաստաբանների խոսքերով ՝ ընդդիմադիր գործչի առողջական վիճակը զգալիորեն վատթարացել է: