Մեղավորները մեկը չեն, երկուսը, 10-ը չեն, դա լուրջ ցանկ է. Սամվել Բաբայան
Երբ փաստերն իրար կողք ես հավաքում, պարզ է դառնում, որ մեղավորները մեկը չեն, երկուսը, 10-ը չեն, դա լուրջ ցանկ է: Այս մասին այսօր՝ ապրիլի 12-ին, լրագրողների հետ զրույցում հայտարարեց Արցախ Անվտանգության խորհրդի նախկին քարտուղար Սամվել Բաբայանը։
«Երկու բառով չես կարող ասել, թե ինչ է եղել։ ՄՈԲ են հավաքում, տանում են առաջնագիծ։ Ամեն տարի ՄՈԲ-ը հավաքվում է, պետք է տանեին՝ որ հրամանատարի մոտ է լինելու, ոնց է լինելու։ Մինչև քրեական գործ հարուցելը, որ ինքը փախել է, պետք է գործ հարուցել, թե քանի անգամ է ինքը եղել կրակայինում։ Ես դեռ պատերազմից 15 օր առաջ եմ ներկայացրել, որ ՄՈԲ-ը պետք է առանձին միավոր դառնա, ոչ թե համալրվի։ Ասին՝ չէ, մենք դուխով ենք, օդում հրթիռ ենք բռնում։ Դե լավ, ասի՝ բռնեք տեսնենք: Շտաբի պետը, որ ասում է՝ երեք օրից հետո ես հասկացա՝ մենք պատրաստ չենք։ Ես առաջարկում եմ ինքը գրավոր ձևի ներկայացնի, թե ինչն է նրան բերել այն բանին, որ բանակը պատրաստ չէ»,- ընդգծեց Բաբայանը։
Բաբայանը խոսել է նաև գեներալների մասին, ովքեր հիմա հարցազրույցներ են տալիս ու բացատրություններ ներկայացնում. «Հենց իրենք են այս վերջին 20 տարին ղեկավարում: Այդ մարդկանց հետախուզության պետերը զեկույցներ են ներկայացրել հակառակորդի զինվելու, զորամասների մասին:
Երբ այդ զեկուցագիրները ներկայացվել են, որոշումներ կայացվե՞լ են նախարարի, ԳՇ պետի կողմից: Ի՞նչ որոշումներ են կայացվել»:
