Ինչ գործընթացով է նախագահը պաշտոնանկ արվում
Այսօր Քաղաքացիական պայմանագիր կուսակցության հիմնադիր եւ վարչության անդամ, «Իմ քայլի» պատգամավոր, ԱԺ Պետական-իրավական հարցերի մշտական հանձնաժողովի անդամ Վահագն Հովակիմյանը ֆեյսբուքյան իր էջում գրել էր, որ առերևույթ հիմքեր կան Արմեն Սարգսյանի պաշտոնանկության գործընթաց սկսելու համար՝ Սահմանադրության կոպիտ խախտման հիմքով (141 հոդված):
Սակայն Սահմանադրությամբ նախագահին պաշտոնանկ անելու գործընթացն այդքան էլ հեշտ չէ:
Սահմանադրության 141-րդ հոդվածի համաձայն Հանրապետության նախագահը կարող է պաշտոնանկ արվել պետական դավաճանության, այլ ծանր հանցագործության կամ Սահմանադրության կոպիտ խախտման համար: Հանրապետության նախագահին պաշտոնանկ անելու հիմքերի առկայության մասին եզրակացություն ստանալու համար Ազգային ժողովը պատգամավորների ընդհանուր թվի ձայների մեծամասնությամբ ընդունված որոշմամբ դիմում է Սահմանադրական դատարան: Եզրակացությունը ստանալուց հետո հարցը ներառվում է ԱԺ օրակարգում: Ազգային ժողովը Հանրապետության նախագահին պաշտոնանկ անելու մասին որոշում է կայացնում պատգամավորների ընդհանուր թվի ձայների առնվազն երկու երրորդով, հայտնում է Armdaily.am-ը:
Նշենք նաև, որ Սահմանադրության 144-րդ հոդվածով Հանրապետության նախագահի պաշտոնանկության, լիազորությունների կատարման անհնարինության, հրաժարականի կամ մահվան դեպքերում մինչև նորընտիր Հանրապետության նախագահի կողմից պաշտոնի ստանձնումը Հանրապետության նախագահի լիազորությունները կատարում է Ազգային ժողովի նախագահը:
