Տարբեր կարծիքներ կարող են լինել, որը պետք է քննարկվի կուսակցությունում. Մելքումյանը՝ Գևորգ Պետրոսյանի մասին
Իմ գործընկերներն իրենք են որոշում իրենց քայլերը, յուրաքանչյուրն իր որոշումն է կայացնում, ես դրանից հետո չեմ զրուցել Գեւորգ Պետրոսյանի հետ: Այս մասին ԱԺ-ում լրագրողների հետ զրույցում նշեց ԱԺ ԲՀԿ խմբակցության պատգամավոր Միքայել Մելքումյանը՝ անդրադառնալով ԲՀԿ խմբակցության պատգամավոր Գեւորգ Պետրոսյանի հայտարարությանը, թե դուրս է գալիս խմբակցությունից:
«Դրանից առաջ որեւէ անգամ այդ տիպի խոսակցություն չի եղել, որ ես նույնիսկ զգամ, որ այդ քայլն է լինելու: Ինքը բացատրություն, պարզաբանում տվել է, թե ինչով է պայմանավորված, եւ մեր ղեկավարի, մեր կողմից եղել է համընդհանուր հարգանք Գեւորգ Պետրոսյանի նկատմամբ»,-ասաց նա:
Դիտարկմանը, որ Գեւորգ Պետրոսյանը հայտարարել է, որ ԲՀԿ-ի կողմից իրադարձություններին ճիշտ ժամանակին հստակ քաղաքական գնահատականներ տալու վճռականության պակասն է նաեւ պատճառը իր նման որոշման, Մելքումյանն ասաց. «Կուսակցությունը կուսակցություն է, որտեղ գործում է կոլեկտիվ մտքի, կոլեկտիվ վերլուծության եւ մտքի մոդելավորման ինստիտուտ: Տենց չի, որ ամեն անհատ պատգամավոր ինքնուրույն որոշում է եւ ասում է՝ ես այսպես եմ գտնում: Տարբեր կարծիքներ կարող են լինել, որը պետք է քննարկվի կուսակցությունում: Կուսակցության վեկտորը ներկայացնելու առումով կուսակցությունը որոշում է կայացնում: Դա չի նշանակում, որ ամեն մի անհատ իր անձնական կարծիքը չի կարող հայտնել, բայց վեկտորի առումով կուսակցությունն է որոշում:
Ինչ վերաբերում է վճռականությանը, ապա քաղաքականությունը հնարավորի արվեստ է, դու պետք է այնպիսի հաշվարկներ անես, գործողություններ անես՝ տեսնելով հաջորդ 3-4 քայլերը, որ եւ պետության համար, եւ ժողովրդի համար, կուսակցության իմիջի համար շահեկան դուրս գաս՝ առանց մեկը մյուսին հակադրելու: Այսինքն պետք է կարողանաս պետության ու ժողովրդի շահը ճիշտ համադրես կուսակցական վարկանիշի հետ: Քո վճռականությունը չպետք է մնա տեսական մակարդակի վրա»:
