Հայաստանը շուկայական երկիր է և յուրաքանչյուրը կարող է զբաղվել բիզնես գործունությամբ. Սուքիասյանի խոսնակը՝ տարածվող լուրերի մասին

Քիչ առաջ մամուլում տեղեկություն տարածվեց այն մասին, որ Խաչատուր Սուքիասյանը գնել է RAN oil-ը. «տեռորի» միջոցով մենաշնորհ է հաստատում բենզինի շուկայում:  Խաչատուր Սուքիասյանը գնել է բենզինի և դիզվառելիքի վաճառքով զբաղվող RAN oil ընկերությունը և արագ տեմպերով մենաշնորհ է հաստատում ոլորտում։ 

Ըստ հրապարակման Սուքիասյանի պահանջով՝ ՊԵԿ-ն ու ԱԱԾ-ն սուգումներով և տուգանքներով բառացիորեն տեռորի են ենթարկում վառելիքի վաճառքով զբաղվող մյուս ընկերություններին, ինչպես նաև վերջինս ավելի խոշոր գումար է առաջարկում մրցակից ընկերությունների բենզալցակայանների տարածքների սեփականատերերին՝ մրցակցիներին շուկայից դուրս մղելու և քաղաքի բանուկ հատվածներում սեփական բենզալցակայանները հիմնելու համար։

Auroranews-ի  հարցմանն ի պատասխան Սուքիասյանի գրասենյակից հայտնում են, որ ՍԻԼ կոնցեռն ընկերությունը ձեռք է բերել «ՌԱՆ ՕԻԼ» ընկերությունը: 

«Բոլոր նրանք, ովքեր տեղյակ չեն, պետք է հիշեցնել, որ Հայաստանը շուկայական երկիր է և յուրաքանչյուրը կարող է զբաղվել բիզնես գործունությամբ, ուզում եմ ևս մեկ անգամ հիշեցնել, որ ՍԻԼ կոնցեռնը Հայաստանում զբաղվում է բիզնես գործունեությամբ, և ՀՀ օրենսդրությամբ իրավունք ունի ձեռք բերել, հիմնել և զբաղվել տարատեսակ բիզնես գործությամբ՝ այդ թվում վառելիքի ներկրմամբ, առքով և վաճառքով:  Ինչ վերաբերվում է մենաշնորհ հաստատելուն, պետք է հատուկ արձանագրել, որ շուկայում ոչ թե մենաշնորհ է ստեղծվում, այլ հակառակը՝ ստեղծվում է մրցակցություն, որից կարող են օգտվել ՀՀ քաղաքացիները՝ ստանալով ավելի լավ որակի վառելիք և ավելի մատչելի գին: Տնտեսության զարգացումը մրցակցության արդյունքում է լինում, այլ ոչ նախկին տարիների նման ստեղծված և քարացած մենաշնորհների: Հասկանալի է, որ այս շուկայում ստեղծվող մրցակցությունից կարող են նեղսրտել տարիներ շարունակ գերշահույթներ ստացած մոնոպոլները: Քաղաքական մանիպուլյացիաներ պարունակող հերյուրանքներին անդրադառնալու կարիք չեմ տեսնում, որովհետև մեր հասարակությունը վաղուց արդեն գիտի և իրականությունը և սուտը: Խիստ մտահոգներին խնդրում եմ դիմել ՌԱՆ ՕԻԼ ընկերության նախկին սեփականատերերին և տեղեկություններ ստանալ գործարքի մասին» ,- մեզ հետ զրույցում ասաց Սուքիասյանի խոսնակ Աննա Մկրտչյանը: