ԱԺ հանձնաժողովը հավանություն տվեց Հաշվեքննիչ պալատի անդամի պաշտոնում Կարեն Առուստամյանի թեկնածությանը

ԱԺ ֆինանսավարկային և բյուջետային հարցերի մշտական հանձնաժողովի արտահերթ նիստում քննարկվեց և հավանության արժանացավ Հաշվեքննիչ պալատի անդամի թափուր տեղի համար «Իմ քայլը» խմբակցության կողմից ներկայացված Կարեն Առուստամյանի թեկնածությունը: Իշխող խմբակցությունն այդ պաշտոնում Առուստամյանի թեկնածությունը ներկայացնում է երկրորդ անգամ:  

Առուստամյանը նշեց, որ Հաշվեքննիչ պալատը պետք է ավելի մեծ ուշադրություն դարձնի ոչ միայն դիսցիպլինար, այլև որակական նշանակություն ունեցող հաշվեքննություններին:  

«Ինձ համար անչափ կարևոր է, որ հայտնաբերենք ոչ թե արդեն տեղի ունեցած անհամապատասխանությունը կամ խեղաթյուրումը և հետո մտածենք՝ ով է պատասխանատվության ենթարկվելու, այլև այնպես անենք, որ դրանք չլինեն: Հաշվեքննության վեկտորը գնա ավելի շատ կանխարգելիչ գործողության»,- ասաց Առուստամյանը:   

Հիշեցնենք՝ դեկտեմբերի 10-ին խորհրդարանում փակ գաղտնի քվեարկությամբ Կարեն Առուստամյանը չէր ընտրվել Հաշվեքննիչ պալատի անդամի պաշտոնում: Կողմ էր քվեարկել 79, դեմ՝ 3 պատգամավոր, մինչդեռ  ընտրվելու համար նրան անհրաժեշտ էր նվազագույնը 80 ձայն: