ՆԱՏՕ-ն մերժել է Վրաստանին. մանրամասներ

ՆԱՏՕ-ն բավարար չափով ներկայացվածություն ունի Վրաստանի տարածքում. Դաշինքի լիարժեք ռազմաբազայի ստեղծումն այս փուլում չի դիտարկվում: Կովկասում և Կենտրոնական Ասիայում ՆԱՏՕ-ի Գլխավոր քարտուղարի հատուկ ներկայացուցիչ Ջեյմս Ապատուրայը վրացական առաջին ալիքին տված հարցազրույցում մերժել է երկրին նման հնարավորությունը:

«ՆԱՏՕ-ն արդեն զգալիորեն ներկայացված է Վրաստանում. Ռազմական անձնակազմի կողմից համատեղ ուսուցման և վերապատրաստման կենտրոնում, ռազմական շինարարության դպրոցում, բացի այդ, ամեն տարի տեղի են ունենում ՆԱՏՕ-ի և Վրաստանի համատեղ զորավարժությունները: ՆԱՏՕ-ն Վրաստանում ունի քաղաքացիական և ռազմական գրասենյակներ», - ասել է նա:

Ապատուրայը շեշտել է, որ դաշինքը ռազմական բազաներ է տեղակայում միայն դաշինքի անդամ երկրների տարածքում, իսկ Վրաստանը՝ որպես գործընկեր պետություն, չի կարող հույս դնել դրա վրա: Այնուամենայնիվ, նա նշել է, որ ՆԱՏՕ-ի ներկայության մակարդակը երկրում աննախադեպ է՝ համեմատած այլ գործընկերների հետ: