«Սբ Գրիգոր Լուսավորիչ» ԲԿ փոխտնօրեններից մեկը 1 մլրդ դրա՞մ է տանուլ տվել» հոդվածը իրականության հետ կապ չունի. ԱՆ խոսնակ
«Հրապարակ» օրաթերթի «Սբ Գրիգոր Լուսավորիչ» ԲԿ-ի փոխտնօրեններից մեկը 1 մլրդ դրա՞մ է տանուլ տվել Տոտոյում» վերտառությամբ հոդվածը և տարածվող տեղեկությունները բացարձակ իրականության հետ կապ չունեն: Այս մասին ֆեյսբուքյան իր էջում գրել է ԱՆ խոսնակ Ալինա Նիկողոսյանը:
««Հրապարակ» օրաթերթի «Սբ Գրիգոր Լուսավորիչ» ԲԿ-ի փոխտնօրեններից մեկը 1 մլրդ դրա՞մ է տանուլ տվել Տոտոյում» վերտառությամբ հոդվածը և տարածվող տեղեկությունները բացարձակ իրականության հետ կապ չունեն:
Եվ չնայած լուրը դեռ երեկ հերքվել էր իմ կողմից, հոդվածում գրված է, թե իբր ես չեմ մեկնաբանել այն: Հոդվածի վերջում միայն նշված է, որ «առողջապահության նախարարությունից նույնպես տանուլ տված միլիարդի մասին տեղեկությունը հերքեցին»:
«Հրապարակ» օրաթերթին կոչ ենք անում չարատավորել անձի բարի համբավը և չտարածել սուտ տեղեկություններ»,- գրել է Նիկողոսյանը:
Ավելի վաղ լուրեր էին տարածվել առ այն, որ բժշկական շրջանակներում քանի օր է՝ սկանդալային լուր է շրջանառվում, թե «Սբ Գրիգոր Լուսավորիչ» ԲԿ փոխտնօրեններից մեկը «Տոտո» բուքմեյքերական գրասենյակում խաղադրույքներ է կատարել՝ օգտվելով հիվանդանոցի դրամարկղից, և մեծ գումարներ է տանուլ տվել՝ 1 մլրդ դրամից ավելի:
«Արդյունքում հիվանդանոցի աշխատողները չեն կարողանում աշխատավարձ ստանալ: Այժմ ԱԱԾ-ում գործ է քննվում: ԱԱԾ-ից ո՛չ հաստատեցին, ո՛չ էլ հերքեցին նշված լուրը: Առողջապահության նախարարի խոսնակը ևս չմեկնաբանեց»,- գրել էր «Հրապարակ» օրաթերթը:
