Ճապոնիան, ԱՄՆ-ն և Ֆրանսիան մայիսին զորավարժություններ կանցկացնեն` որպես նախազգուշացում Չինաստանին

Ճապոնիան, ԱՄՆ-ն և Ֆրանսիան հաջորդ տարվա մայիսին ծրագրում են անցկացնել առաջին համատեղ ցամաքային և ռազմածովային զորավարժությունները: Այս մասին տեղեկացնում է «Ինտերֆաքս» գործակալությունը` հղում տալով «Սանքեյ Սիմբուն» պարբերականին:

Նախատեսված զորավարժությունների խնդիրներից մեկը պետք է լինի փրկարարական գործողությունների իրականացումը ծովում և բնական աղետների ժամանակ: Միաժամանակ դրանք ուղղված կլինեն Չինաստանին հակազդելուն, գրում է թերթը: Ակնկալվում է, որ զորավարժությունների համար կօգտագործվի հեռավոր ճապոնական կղզի:

Պարբերականը հիշեցնում է, որ Ճապոնիան մասնավորապես մտահոգված է Արևելյան Չինական ծովում վիճելի Սենկակու կղզիների (չինական անվանումով ՝ Դյոյույդաո) շուրջ չինական ռազմական ակտիվության աճով:

«Մենք ցանկանում ենք ցույց տալ մեր ներկայությունը տարածաշրջանում և Ճապոնիայի և Ֆրանսիայի միջև համագործակցության ազդանշան ուղարկել», - պարբերականին տված հարցազրույցում ասել է Ֆրանսիայի ռազմածովային ուժերի շտաբի պետ, ծովակալ Պիեռ Վանդյեն:

«Այս հաղորդագրությունն ուղղված է Չինաստանին: Այն բազմակողմ գործընկերության և ծովային նավարկության ազատության ուղերձ է»,-ավելացրել է ծովակալը: