ԼՂ-ում ևս 100 պայթյունավտանգ առարկա են ոչնչավել. ՌԴ պաշտպանության նախարարություն

Ռուսաստանի պաշտպանության նախարարության հակաականային միջազգային կենտրոնի մասնագետները Լեռնային Ղարաբաղում մեկ օրում ոչնչացրել են 100 պայթյունավտանգ առարկա, ինչպես նաև ականազերծել են Շուշի-Լիսագոր ավտոճանապարհի ևս 3 կմ, հաղորդում է ՌԴ պաշտպանության նախարարությունը։

«Ռուսական ինժեներական ստորաբաժանումներն իրականացնում են տեղանքի և ընդհանուր օգտագործման ճանապարհների ինժեներական հետախուզություն և ականազերծում խաղաղապահական դիտակետերի միջև, բնակավայրերի և սոցիալական ենթակառուցվածքների օբյեկտների մոտ։ Կենտրոնի մասնագետները կատարել են ինժեներական հետախուզություն և Շուշի-Լիսագոր ավտոճանապարհի 3 կմ հատվածից հեռացրել են պայթյունավտանգ առարկաները։ Մեկ օրում հայտնաբերվել է ավելի քան 100 պայթյունավտանգ առարկա, որոնք տեղափոխվել են հատուկ սարքավորված զորավարժարան և ոչնչացվել», – գրված է ՌԴ ՊՆ կայքում։

Գերատեսչությունից հաղորդում են, որ խաղաղապահական գործողությունների ընթացքում ռուսական ինժեներական ստորաբաժանումները Լեռնային Ղարաբաղում մաքրել են ավելի քան 24 հեկտար տարածք և ավելի քան 8 կմ ճանապարհ, հայտնաբերել և վնասազերծել են ավելի քան 750 պայթյունավտանգ առարկա։ Այն զինատեսակները, որոնք հնարավոր չէ տարհանել զորավարժարան, ոչնչացվում են տեղում՝ նախապես ապահովելով անվտանգությունը։

ՌԴ ՊՆ-ն նաև հաղորդում է, որ ռուս խաղաղապահները տեղի իշխանություններին օգնում են վերականգնել երթևեկությունը, սոցիալական օբյեկտների և բնակելի շենքերի էլեկտրամատակարարումը, ջրամատակարարումը և ջերմամատակարարումը։