Հրավեր է եղել, քաղաքական ուժերն իրենց կարծիքներն են հայտնել. Շարմազանով

Սա պատմական և կարևոր ժամանակահատված է մեր երկրի համար և չպետք է  ներքաղաքական  օրակարգով առաջ գնալ։ Այս մասին այսօր Կառավարության դիմաց լրագրողների հետ զրույցում ասաց ՀՀԿ նախկին պատգամավոր Էդուարդ Շարմազանովը՝ խոսելով վարչապետ Նիկոլ Փաշինյանի և  արտախորհրդարանական ուժերի հանդիպման մասին։ 

«Հրավեր է եղել, քաղաքական ուժերն իրենց կարծիքներն են հայտնել, սրանից ավել ինֆորմացիա չեմ կարող տալ» ,-ասաց նա։ 

Հարցին, թե Արցախի հարցով քաղաքական ուժի և վարչապետի կարծիքներն համընկնում էին, վերջինս պատասխանեց, որ համընկնելու մասով պետք է իշխանությանը հարցնել, իսկ ընդդիմադիր ուժը հստակ ասել է՝ Արցախը չի լինելու Ադրբեջանի կազմում։ 

Նրա կարծիքով՝ պետք է ամեն ինչ անել, որ հրադադարի որոշումն իրագործվի։ 

Հարցին, թե արցախյան խնդիրը քննարկվել է ՀՀ երրորդ նախագահ Սերժ Սարգսյանի հետ, Շարմազանովը պատասխանեց. «Ես, եթե այսօր այստեղ եմ, ուրեմն ներկուսակցական քննարկում է եղել, ես ինքնագլուխ չեմ ներկայացել»։