Թուրքիան ու Ադրբեջանը դիվանագիտական ինքնասպանության եզրին են. Ռուբինյան

Թուրքիայի և Ադրբեջանի գործողություններն ու հայտարարությունները հրապարակային և ոչ հրապարակային կերպով քննադատվում են Եվրախորհրդարանում, ԵԽԽՎ-ում, տարբեր երկրների խորհրդարաններում, ՄԻԵԴ-ը բավարարել է Թուրքիայի և Ադրբեջանի նկատմամբ միջանկյալ միջոց կիրառելու՝ Հայաստանի հայցերը, Ռուսաստանը, Ֆրանսիան, Իրանը հաստատում են թուրքա-ադրբեջանական ներկրված տեռորիստների ներկայությունը ռազմական գոտում, Հունաստանը հետ է կանչում Բաքվում իր դեսպանին՝ խորհրդակցությունների համար։ Այս մասին հայտնել է ՀՀ ԱԺ Արտաքին հարաբերությունների մշտական հանձնաժողովի նախագահ Ռուբեն Ռուբինյանը։

«Թուրքիան ու Ադրբեջանը դիվանագիտական ինքնասպանության եզրին են»,- գրել է նա։

Սեպտեմբերի 27-ի վաղ առավոտյան Ադրբեջանը, խախտելով բոլոր միջազգային պարտավորվածությունները, թուրքական բանակի և Մերձավոր Արևելքից բերված ահաբեկիչների անմիջական մասնակցությամբ հարձակում է գործել Արցախի ուղղությամբ։ Այդ ընթացքում բազմիցս հրետակոծվել են թե՛ Արցախի և թե՛ Հայաստանի բնակավայրերը, խաղաղ բնակչության շրջանում կան բազմաթիվ զոհեր ու վիրավորներ, ավերվել են տասնյակ շինություններ, ահռելի վնաս է հասցվել քաղաքացիական ենթակառուցվածքներին։

Հայկական Զինված ուժերը հերոսական ու համառ մարտեր են մղում հակառակորդի դեմ՝ պատճառելով նրան կենդանի ուժի և տեխնիկայի ծանրագույն կորուստներ։