Կրկին պարգևատրումներ կլինեն. Առողջապահության նախարարությունից՝ «Նորք ինֆեկցիոն»-ի աշխատակիցներին

Ավելի վաղ հայտնել էինք, որ «Նորք ինֆեկցիոն» հիվանդանոցի աշխատակիցները բաց նամակով են հանդես եկել՝ ուղղված ՀՀ վարչապետին և ՀՀ նախագահին։ Աշխատակիցներն իրենց բաց նամակում իրենց դժգոհությունն են հայտնում՝ քանի որ ինֆեկցիոնի աշխատակիցներից ոչ ոք Անկախության տոնին նվիրված պարգևատրման արարողության ժամանակ չպարգևատրվեց։ 

ArmDaily.am-ի հետ զրույցում Առողջապահության նախարարի խորհրդական Աշոտ Սարգսյանը նշել է, որ ինֆեկցիոնի աշխատակազմը մի փոքր շտապել է.«Կովիդի դեմ պայքարում  շատ բժիշկներ են եղել։ Ներգրավված են եղել տարբեր հիվանդանոցների բուժաշխատողներ։ Ֆիզիկապես մեկ օրվա մեջ բոլորին տեղում շնորհավորել և պարգևատրել անհնար է։ ԱՆ-ն բավականին մեծ ցուցակ է ներկայացրել վարչապետին, մոտ օրերս կրկին պարգևատրումներ կլինեն»:
Վարչապետի մամուլի խոսնակ Մանե Գևորգյանն էլ նշեց, որ այս պահին տեղյակ չէ, որ նախարարությունից ավելի մեծ ցուցակ է ներկայացվել և կրկին  լինելու է պարգևատրման արարոողություն.«Այս հարցով ավելի ճիշտ կլինի դիմել նախագահական»։