ՀՀ երրորդ նախագահ Սերժ Սարգսյանի և մյուսների գործով դատական նիստին Սերժ Սարգսյանը ներկա չէ: 

Նրա պաշտպան Ամրամ Մակինյանը դատարանին բժշկական փաստաթուղթ ներկայացրեց. «Ստուգվել է համապատասխան բժշկի կողմից եւ արձանագրվել է սուր շնչառական վարակ։ Նա բժշկական հաստատությունում չի գտնվում»։

Դատարանի հարցին՝ արդյոք Սերժ Սարգսյանի առողջական վիճակում այսօր դրական տեղաշարժ եղե՞լ է, Մակինյանն ասաց, որ իր վերջին տեղեկություններով վիճակը նույնն է։

Գործով մեղադրող դատախազն էլ առարկեց, նշելով, որ բժշկական փաստաթղթից պարզ չի դառնում, թե այս պահին ինչպե՞ս է Սերժ Սարգսյանի առողջական վիճակը. «Բժշկական փաստաթղթի բովանդակությունից պարզ չէ թե ներկա պահին Սերժ Սարգսյանն օբյեկտիվորեն զրկվա՞ծ է եղել դատական նիստին մասնակցելուց, թե՞ ոչ։ Այստեղ նշվում է, որ ջերմաստիճանի բարձրացում է եղել եւ կանչ է գրանցվել, հիմա ջերմաստիճանն իջե՞լ է, թե՞ նորից բարձր է»։

Դատավոր Վահե Միսակյանն, այուամենայնիվ, ասաց, որ Սերժ Սարգսյանի բացակայությունն այսօր անհարգելի չի համարում։

Դատական հաջորդ նիստը նշանակվեց հոկտեմբերի 22-ին՝ ժամը 15։00-ին։

Նշենք, որ նախորդ դատական նիստին դատարանն անհարգելի էր համարել Սերժ Սարգսյանի բացակայությունը։