ՄԱԿ-ը հայտնում է Բելառուսում ավելի քան 6000 ձերբակալվածի մասին

Բելառուսում բողոքի ակցիաների ժամանակ ձերբակալվել է ավելի քան 6000 մարդ, որոնց թվում կան պատահական անցորդներ և անչափահասներ։ Այս մասին ասվում է մարդու իրավունքների հարցերով ՄԱԿ-ի գերագույն հանձնակատար Միշել Բաչելետի հայտարարության մեջ։

Նա կոչ է արել անհապաղ ազատ արձակել բոլոր նրանց, ովքեր ապօրինաբար կալանքի են ենթարկվել։ Իսկ նրանց համար, ովքեր անհամաձայնության խաղաղ արտահայտման համար ենթարկվել են դաժան վերաբերմունքի, պետք է ապահովել արդարադատություն և փոխհատուցել վնասը, հայտնել է Բաչելետը։

ՄԱԿ-ի տվյալերով՝ առնվազն 250 մարդ վնասվածքներ է ստացել, ցույցերի ևս մեկ մասնակից՝ մահացել։

Կազմակերպությունը հանրապետությունում մարդու իրավունքների խախտումների մասին բոլոր հայտարարությունների մանրակրկիտ, անկախ և անաչառ հետաքննման կոչ է արել։