Ապրիլին մենք հիսուն հազար աշխատատեղի կրճատում ունեցանք. Փաշինյան

Ապրիլին, երբ երկիրը երկու ամսվա խիստ սահմանափակումների ռեժիմում էր ապրում, արձանագրեցինք, որ սոցիալական և տնտեսական խնդիրները շատ արագ տեմպերով խորանում են: Այս մասին կառավարության արտահերթ նիստի ընթացքում հայտնեց ՀՀ վարչապետ Նիկոլ Փաշինյանը:

«Ապրիլին մենք հիսուն հազար աշխատատեղի կրճատում ունեցանք: Տեսնում ենք, որ, այնուամենայնիվ, ինչքան էլ երևացող հատվածներում կամ առերևույթ հակահամաճարակային որոշակի կանոններ հնարավոր էր լինում պահել, ամբողջ հանրապետության տարածքում, մասնավորապես ոչ շատ տեսանելի հատվածներում տեսնում էինք, որ կանոնները ոչ մի կերպ չեն պահվում: Մյուս կողմից, մենք եկանք այն արձանագրման, որ անհնար է առանց քաղաքացիների ներգրավվածության, առանց պատասխանատվության կիսման խնդիրը լուծել: Մենք եկանք այն եզրակացության, որ կառավարությունն իր պատասխանատվության հատվածը պետք է կրի, բայց հնարավոր չէ հակահամաճարակային իրավիճակը պահել առանց քաղաքացիների մասնակցության: Այս դահլիճում մենք շատ լարված քննարկումներ ենք ունեցել՝ որոշումների հետ կապված: Որոշեցինք, որ քաղաքացիներին պետք է ուղիղ ներկայացնենք իրավիճակը, և մյուս կողմից, կառավարության թիվ մեկ պատասխանատվությունն է, որ որևէ քաղաքացի չմնա առանց պատշաճ բուժօգնության»,-ասաց Փաշինյանը:

Վարչապետը նշեց, որ խնդիրն արմատապես լուծելու հնարավորություն ենք ստացել:

«Ուզում եմ ընդգծել ոստիկանության կոշտ արձագանքը: Այսօր թվերի նվազմանը զուգահեռ դիմակ չկրելու համար տուգանվող քաղաքացիների թվի էական աճ ունենք: Սա նշանակում է, որ թվերի նվազման մասին ուղերձը քաղաքացիները չափից ավելի լավատեսորեն են ընդունում: Եթե մենք հիմա այս իրավիճակը ճիշտ չգնահատենք, կարող ենք էլի հետ գլորվել հուլիսի իրավիճակին»,-ասաց Փաշինյանը:

Վարչապետն ընդգծեց դիմակի կրման բացառիկ կարգապահության անհրաժեշտությանը: