«Յուքոմը» դատի է տվել «Թիմին»՝ անբարեխիղճ մրցակցության համար

Հեռահաղորդակցության ոլորտի խաղացողներից «Յուքոմը» դատական հայց է ներկայացրել նորաստեղծ «Թիմ» ՍՊԸ-ի դեմ՝ անբարեխիղճ մրցակցության համար։ Այս մասին  հայտնում է  «Փաստինֆո»-ն: 

Հայցվոր կողմը հայցադիմումով խնդրել է դատարանից արգելել «Թիմ» ՍՊ ընկերությանը՝ անբարեխիղճ մրցակցությունը, այն է՝ դադարեցնել «Վեոն Արմենիա» ՓԲ ընկերության բաժնետոմսերի ձեռքբերման գործարքի կնքման շուրջ բանակցություններ վարելը և (կամ) «Վեոն Արմենիա» ՓԲ ընկերության բաժնետոմսերի ձեռքբերման բանակցող գործարքը (ներառյալ ստորագրել, գրանցել ծագող իրավունքները և կատարել ցանկացած այլ գործողություն, որն ուղղված է գործարքի կնքմանը)։
Գործը մակագրվել է Երևան քաղաքի դատավոր Հովիկ Շահնազարյանին։

Հիշեցնենք, որ հուլիսի 10-ին Հանրային ծառայությունները կարգավորող հանձնաժողովը (ՀԾԿՀ) համաձայնություն էր տվել, որ «Թիմը» ձեռք բերի «Բիլայն» ապրանքանիշը ներկայացնող «Վեոն Արմենիա» ՓԲԸ-ի բաժնետոմսերի 100 տոկոսը։ Նույն օրը գործարքին թույլտվություն էր տվել նաև Տնտեսական մրցակցության պաշտպանության պետական հանձնաժողովը՝ պայմանով, որ «Բիլայնի» աշխատակիցների զանգվածային կրճատումներ չպետք է կատարվեն։

Ավելի ուշ ՀԾԿՀ որոշումներից մեկով պարզ դարձավ, որ «Վեոն Արմենիան» գնելուց հետո «Թիմը» որոշել է վերջինիս շարժական և անշարժ գույքերն ու բաժնետոմսերը գրավադնել «Արդշինբանկում»։ Գործարքի հստակ գին չի նշվում։