Ռոմանոս Պետրոսյանը վաղը կազատվի Կոտայքի մարզպետի պաշտոնից

Այսօր «Ժողովուրդ» օրաթերթը գրել էր, որ հնարավոր է Կոտայքի մարզպետ Ռոմանոս Պետրոսյանը նշանակվի Շրջակա միջավայրի նախարար։ ArmLur.am-ի հետ զրույցում մարզպետը նշել էր, որ պաշտոնապես որևէ նման բան այս պահին չկա և չի ցանկացել մեկնաբանել լուրը:

АrmDaily.am-ի հետ զրույցում վարչապետի խոսնակ Մանե Գևորգյանը նշել է, որ չի կարող այս լուրը հաստատել կամ հերքել. «Եթե նման որոշում լինի, լինելու է նաև համապատասխան վարչապետի որոշում, որը կհրապարակվի»։

Եվ ահա հենց այս լուրերի համատեքստում էլ կառավարության նիստի վաղվա օրակարգում է ներառվել Կոտայքի մարզպետ Ռոմանոս Պետրոսյանին զբաղեցրած պաշտոնից ազատելու հարցը: Իսկ շրջանառվող լուրերի համաձայն էլ վերջինս կնշանակվի Շրջակա միջավայրի նախարարի պաշտոնում:

Հիշեցնենք, որ վարչապետ Նիկոլ Փաշինյանի առաջարկությամբ, Նախագահ Արմեն Սարգսյանի հրամանագրով մայիսի 5-ին Էրիկ Գրիգորյանը ազատվել էր Շրջակա միջավայրի նախարարի պաշտոնից։ Նախարարի լիազորություններն այս ընթացքում կատարում է առաջին փոխնախարար Վահե Ջիլավյանը: