Հայաստանում կորոնավիրուսի կրկնակի վարակման դեպքեր կան. ո՞րն է պատճառը

Հայաստանում կորոնավիրուսի կրկնակի վարակման մի քանի դեպք է գրանցվել։ Պարետատան նիստի ավարտից հետո ճեպազրույցի ժամանակ տեղեկությունը հայտնեց ՀՀ առողջապահության նախարար Արսեն Թորոսյանը։

«Գիտական մակարդակի հետազոտությունների կարիք կա` հասկանալու, թե ինչով են դրանք պայմանավորված։ Ամեն դեպքում դրանք լայնածավալ և մեծամասշտաբ չեն և, ամենայն հավանականությամբ, պայմանավորված են կոնկրետ անձանց առողջական առանձնահատկություններով, գուցե բջջային մակարդակի առանձնահատկություններով»,–ասաց նախարարը։

Արսեն Թորոսյանի խոսքով` կրկնակի վարակման դեպքեր եղել են նաև այլ երկրներում։Նա նշեց, որ սա ևս մեկ առիթ է մտածելու, որ հիվանդանալ–լավանալն առիթ չէ անվտանգության կանոնները չպահպանելու համար։ Սակայն, մյուս կողմից, այնպես էլ չէ, որ անհանգստանալու պատճառ կա, և բոլոր հիվանդացածները նորից պետք է վարակվեն։