ՀՀ սահմանին ադրբեջանական ագրեսիան մի շարք խնդիրներ է վեր հանել. Նարեկ Մալյան

«ՎԵՏՕ» շարժման ղեկավար Նարեկ Մալյանը ֆեյսբուքյան իր էջում գրառում է արել՝ նշելով, որ անցյալ շաբաթ ՀՀ սահմանին ադրբեջանական ագրեսիան մի շարք խնդիրներ է վեր հանել։

Գրառումը ներկայացնում ենք ստորև․ 

«Վերջին շաբաթվա ընթացքում ՀՀ սահմանին ադրբեջանական ագրեսիան մի շարք խնդիրներ վեր հանեց:

Չնայած նրան, որ նույնիսկ ամենաարմատական ընդդիմադիրները համախմբվեցին պետության և բանակի շուրջ, ՀՀ իշխանությունն այդպես էլ չկարողացավ ապահովել ադրբեջանական ագրեսիայի դեմ պատշաճ միջազգային արձագանք և սա այն դեպքում, երբ թշնամու հարձակումը Հայաստանի միջազգայնորեն ճանաչված պետական սահմանների դեմ էր:

Այսինքն պատերազմը Հայաստանի Հանրապետության դեմ էր` միջազգայնորեն ճանաչված սուբյեկտի, ՄԱԿ-ի լիիրավ անդամ հանդիսացող պետության: Բացի Գվատեմալայի փոխխոսնակի թաքուն և ժպիտ առաջացնող հայտարարությունից որևէ լուրջ արձագանք, միջազգային որևէ հայանպաստ արձագանք իշխանությունները չկարողացան ապահովել:

Փոխարենը մեր իշխանությունը սահմանի կռվի ամենաթեժ պահին, կռիվը թողած ընդդիմադիրների դեմ ֆեյքային սուտ արշավներ էր կազմակերպում: Չեմ խոսում կռվի էպիկենտրոնում գտնվող և թուրքերին փառապանծ ջարդ տված գեներալ Խաչատուրովի նկատմամբ խանդոտ փնթնփնթոցների մասին:
 

Սրանք էին Տավուշի դասերը...»,-նշված է հրապարակման մեջ: