Ադրբեջանին սպառազինության վաճառքը մահացու բնույթ է կրում. ԱԳՆ
Հայաստանի ԱԳՆ-ը ուշադրության կենտրոնում է պահում Ադրբեջանին սպառազինություն վաճառելու հարցը: Այս մասին հուլիսի 18-ի ճեպազրույցում ասաց Հայաստանի ԱԳՆ մամուլի քարտուղար Աննա Նաղդալյանը:
Պատասխանելով հարցին, թե կանդրադառնա արդյոք հայ-ադրբեջանական հարաբերությունների վրա այն փաստը, որ Ադրբեջանը Հայաստանի խաղաղ բնակչության դեմ օգտագործում է իսրայելական արտադրության հարվածային դրոններ, Աննա Նաղդալյանն ընդգծեց, որ հայկական կողմը ավելի լայն է դիտարկում այդ հարցը:
«Ադրբեջանին զենք վաճառելու եւ սպառազինության մրցավազքի հարցը արտաքին գործերի նախարարությունը բարձրացնում է երկկողմ հանդիպումների ժամանակ եւ միջազգային հարթակներում: Կարծում ենք, որ զենքի վաճառքը Ադրբեջանին մահացու բնույթ է կրում: Ադրբեջանն առանց հապաղելու զենք կկիրառի խաղաղ բնակչության դեմ: Հուլիսի 12-ին հաջորդած իրադարձությունները փաստերով հաստատում են մեր խոսքերը: Մենք հետեւողական կլինենք այս հարցում»,- նշեց Աննա Նաղդալյանը:
