«Իմ քայլի» թիրախում ԲՀԿ-ական պատգամավորներն են. Նաիրա Զոհրաբյանին անվստահություն կհայտնե՞ն․ «Հրապարակ»

«Լիլիթ Մակունցն ու Սիսակ Գաբրիելյանն ԱԺ կանոնակարգում փոփոխություններ են նախաձեռնում՝ ուզում են ԱԺ էթիկայի մշտական հանձնաժողով ստեղծել, ինչպես նախկինում էր։ Նոր կանոնակարգով էթիկայի հանձնաժողովը ժամանակավոր է՝ կոնկրետ դեպքի համար ստեղծված: Մշտական հանձնաժողով ունենալու հարցն օրակարգ է բարձրացել ԲՀԿ-ի դեմ պայքարի շրջանակում, հատկապես՝ Նաիրա Զոհրաբյանի և Գևորգ Պետրոսյանի «համար»։ Նրանք հայհոյախառն հաղորդագրություններ էին ստացել և համարժեք պատասխանել։ Իմքայլականները հեռուն գնացող ծրագիր ունեն։ Երբ հանձնաժողովն արձանագրի, որ նրանք խախտել են էթիկան, արդեն կնախաձեռնեն ԱԺ մարդու իրավունքների հանձնաժողովի նախագահ Նաիրա Զոհրաբյանին անվստահություն հայտնելու գործընթաց և փակ քվեարկությամբ կորոշեն հարցը։

Մակունցը ԼՀԿ-ին և ԲՀԿ-ին առաջարկել է նախագծի համահեղինակ դառնալ։ Ձեռնարկի հաջողության դեպքում հանձնաժողովի նախագահի պաշտոնը ԼՀԿ-ին են խոստացել, բայց ԼՀԿ-ն մերժել է։ Էդմոն Մարուքյանն ասաց՝ քանի դեռ չկա նախագիծ, մենք ձեռնպահ ենք մնում կարծիք հայտնելուց․ «Իրենց նախաձեռնությունն է, թող բերեն, կհասկանանք՝ ինչի մասին է, ըստ այդմ էլ կքննարկենք»։ Ապա հավելեց․ «Էթիկայի հանձնաժողով ստեղծելու փոխարեն թող խուլիգանական հարձակումներ չկազմակերպեն։ Թիկունքից խփող պատգամավորներին ոչ թե արդարացնեն, այլ պատժեն, էթիկայի հանձնաժողով ստեղծելուց առաջ նախ գործով պիտի ապացուցել այդ ամենը»։ ԲՀԿ-ն իր հերթին քննարկում է՝ եթե Զոհրաբյանին «կպնեն», հրաժարվել ԱԺ բոլոր պաշտոններից՝ հանձնաժողովի նախագահի, ԱԺ փոխխոսնակի»,-գրում է թերթը։

Նյութն ամբողջությամբ կարդացեք թերթի այսօրվա համարում: