Ինչու որոշվեց Երևանում առավելագույն արագություն սահմանել 60կմ/ժ. պատգամավոր

Օրերս Ոստիկանությունը հայտարարություն տարածեց, որ երթեւեկության անվտանգության բարելավմանև ճանապարհատրանսպորտային պատահարների նախականխման նպատակով Երեւան քաղաքի այն ճանապարհահատվածներում, որտեղ տրանսպորտային միջոցների երթեւեկության թույլատրելի առավելագույն արագությունը 60 կմ/ժ-ից ավելի է սահմանված, 2020թ. հուլիսի 18-ից կկատարվի երթեւեկության կազմակերպման փոփոխություն, որի արդյունքում նման բոլոր ճանապարհահատվածներում երթեւեկության թույլատրելի առավելագույն արագությունը կսահմանվի 60 կմ/ժ:

Այդ ճանապարհահատվածներն են՝ 1.Իսակովի պողոտա 2.Թբիլիսյան խճուղի 3.Մոնթե Մելքոնյան փողոց 4. Աճառյան փողոց 5. Դավիթ-Բեկի փողոց 6. Մյասնիկյան պողոտա 7. Սարալանջի պողոտա 8. Աշտարակի խճուղի:

ArmDaily.am-ի հետ զրույցում «Իմ քայլը» խմբակցության պատգամավոր Արմեն Խաչատրյանը նշել է, որ Ճանապարհային ոստիկանությունը ճանապարհային պատահարների վերլուծություն է արել, ինչպես միշտ է անում և պարզել է, որ Երևան քաղաքում 20 տոկոս զոհերով տրանսպորտային պատահարների կուտակման վայրեր են հանդիսանում 7 փողոցներ. «Եվ երբ վերլուծություն են արել տեսնելու համար, թե այդ 7 փողոցն ինչով է տարբերվում մյուս փողոցներից և ինչու է այդտեղ 20 տոկոս զոհերի վիճակագրություն առկա, պարզվել է, որ այդ բոլոր փողոցներում երթևեկության սահմանված առավելագույն արագությունը գերազանցում է 60կմ/ժ-ը։ Հետևաբար այդ վերլուծությունը ներկայացվել է Ոստիկանության պետին, վերջինս էլ ներկայացրել է Երևանի քաղաքապետին, որ միջոցներ ձեռնարկվի այդ ուղղությամբ։ Ասեմ, որ երթևեկության կանոններով, որ տասնյակ պետություններով ընդունել են ու միատեսակ են, սահմանված է, որ բնակավայրերոմ առավելագույն արագությունը 60կմ/ժ-ն է,բայց մեր օրենսդրությունն այնպիսին էր, որ մինչև 70 եթե լինում էր, այսինքն 10կմ/ժ ավել էր լինում, տուգանք չէր լինում։ Փաստացի ստացվում է, որ Երևանում կարելի է երթևեկել մինչև 70կմ/ժ արագությամբ։ Բացի այդ, մի շարք միջազգային կազմակերպություններ, որոնք շահագրգռված են երթևեկության անվտանգությամբ, տարիներ շարունակ մեզ հորդորում են, որ այդ շեմը, որը թույլատրված է իջեցնել 60, նույնիսկ հորդորում էին 50։ Քանի որ եվրոպական մի շարք երկրներում առավելագույն արագությունը քաղաքներում սահմանված է 50կմ/ժ-ը»։

Խաչատրյանի խոսքով՝ այս վելուծության հիման վրա որոշվել է, որ այդ 7 փողոցների առավելագույն արագությունը սահմանվի 60կմ/ժ, այսինքն մինչև 70 կթույլատրվի և ըստ այդմ վիճակագրությունը ցույց կտա՝ սա ազդելու է զոհերի թվի նվազմանը, թե ոչ։