Հրազդան քաղաքում կնորոգվեն բազմաբնակարան շենքերի վերելակները
Հրազդան քաղաքում կնորոգվեն բազմաբնակարան շենքերի վերելակները։ Այս մասին ֆեյսբուքյան իր էջում գրել է Կոտայքի մարզպետ Ռոմանոս Պետրոսյանը։
«2020 թվականի սուբվենցիաների տրամադրման նպատակով կառավարությունում ստեղծված միջգերատեսչական հանձնաժողովի նիստում Կոտայքի մարզից քննարկմանը ներկայացված և արդեն հավանության արժանացած ծրագրով Հրազդան քաղաքում նախատեսված է բազմաբնակարան շենքերի վերելակների նորոգում:
Քաղաքի վերելակների կեսից ավելին արդեն սպառել են իրենց ռեսուրսները, որոշներն էլ կորցրել են անվտանգությունն ապահովող մասերը, այդ իսկ պատճառով այս ծրագրի որակյալ և ժամանակին իրականացումը առաջնահերթ լուծում պահանջող խնդիր է մեզ համար:
Վերելակների ֆոնդի թարմացման և նորոգման ծրագրի արժեքն է 96.424.300 ՀՀ դրամ, որից 50 %-ը պետության ֆինանսավորումն է, մնացած մասը՝ համայնքի ներդրումը:
Սուբվենցիոն լայնածավալ ծրագրերի արդյունքում հերթով լուծելու ենք քաղաքի համար կենսական կարևորություն ունեցող խնդիրները և #էտալոնայինԿոտայք ունենալո՛ւ ենք»,- գրել է մարզպետը:
