Արցախ կարող եք մուտք գործել միայն COVID 19-ի թեստի բացասական պատասխանը ձեռքին. Արցախի նախագահ

Արցախ մուտքն արգելվելու է առանց կորոնավիրուսի ախտորոշման թեստի բացասական արդյունքի: Այս մասին հունիսի 8-ին իր ուղերձում ասել է Արցախի նախագահ Արայիկ Հարությունյանը:

Նա նշել է, որ Արցախի սահմանը պետք է հատել COVID 19-ի թեստի բացասական պատասխանը ձեռքին, այսինքն՝ միայն  հետազոտվելուց հետո պետք է Արցախ գնալ: Անցակետերում արագ թեստավորում իրականացնելու հանձնարարականներ կլինի:

Հարությունյանն ասել է, որ Հայաստանից օրական գրեթե 500-600 մարդ է Արցախ ելումուտ անում: Նրա խոսքով՝ ՀՀ վիճակագրական թվերից ու հավանականության տեսությունից ելնելով՝ Արցախ թույլատրում են մուտք գործել նաև այնպիսի քաղաքացիների, որոնք վարակակիր են ու կարող են վիրուսի հնարավոր աղբյուր առնալ:

«Հենց այսպիսի պրակտիկան է թույլ տվել խուսափել Պաշտպանության բանակում վարակման դեպքերից: Արցախ մեկնող քաղաքացիներին կտրվեն տեղեկատու թերթիկներ՝ անվտանգության պահանջների ցուցումներով, որոնք պարտադիր են լինելու բոլորի համար: Դրանից բացի, անհրաժեշտ է աստիճանաբար անցնել դիմակների կրման պարտադիր ռեժիմին: Անվտանգության նորմեր կընդունվեն նաեւ սգո եւ ամուսնության արարողություններ անցկացնելիս, իսկ պահանջները խախտողները կենթարկվեն խիստ պատասխանատվության: Նման միջոցառումները պայմանավորված են այն հանգամանքով, որ հենց հոգեհանգիստները, հուղարկավորություններն ու հարսանիքներն են դառնում վարակման հիմնական օջախներից մեկը»,- նշել է Արայիկ Հարությունյանը: