Շուտով կունենանք իմունիտետ որոշող թեստեր. նախարար

«Ազատության» հետ ճեպազրույցում ՀՀ առողջապահության նախարար Արսեն Թորոսյանը հայտնեց, որ շուտով կունենանք իմունիտետ որոշող թեստեր: «ՌԴ-ի մեր գործընկերները մեզ կհատկացնեն, և արդեն կկարողանանք իմունոգլոբինները որոշել»,- ասաց Թորոսյանը՝ շեշտելով, որ մինչ այժմ աշխարհում շատ քիչ են իմունիտետ որոշող թեստերը:

«Կային  ռապիդ թեստեր, որոնք շատ թույլ ինֆորմատիվ էին. հիմա կունենանք իմունիտետը որոշելու իսկական ճշգրիտ թեստեր»,-նշեց Թորոսյանը:

Անդրադառնալով կորոնավիրուսով հիվանդանալուց հետո իմունիտետի ձևավորման հավանականությանը՝ Թորոսյանը դժվարացավ պատասխանել, քանի որ դրա համար, նրա խոսքերով, ժամանակ է անհրաժեշտ:

«Եթե այսօր է վարակը տեղի ունեցել, և հիվանդը լավացել է, ես ինչպե՞ս կարող եմ իմանալ՝ երեք տարի հետո իմունիտետը կպահպանվի այդ մարդու մոտ, թե՞ ոչ: Ես առավելագույնը կարող եմ իմանալ՝ իր լավացման օրից հաշված իմունիտետ պահպանվել է, թե ոչ»,- ասաց նա: